Sýretti túsirgen – Birlik AZAMAT
Jahandyq tájirıbege úńilsek, sportta úzdik nátıjege qol jetkizip júrgen elder reformany sport menedjmentin, saladaǵy ǵylym-bilimdi damytýdan bastaıdy. Sıfrlandyrýdy ıgerý, jańa tehnologııalarǵa ıek artý tabysqa jetkizedi. Osy turǵyda Týrızm jáne sport mınıstrligi Ǵylym jáne joǵary bilim mınıstrligimen birlesip, salaǵa bilikti basshy, tájirıbeli maman daıarlaýǵa basymdyq berip otyr. Executive MBA (EMBA) Sport Management baǵdarlamasy – sporttaǵy san salaly jumystyń bir baǵyty. Týrızm jáne sport mınıstri Erbol Myrzabosynov pen Ǵylym jáne joǵary bilim mınıstri Saıasat Nurbek baǵdarlama túlekterine dıplom tapsyrdy.
– EMVA baǵdarlamasy boıynsha oqyp, tájirıbesin arttyrǵan mamandarǵa tabys tileımiz. Bul – sport menedjmentin, sporttaǵy ǵylymdy, sport medısınasyn damytý maqsatynda jasalyp otyrǵan mańyzdy qadam. Sportshylarymyz jahandyq deńgeıde tabysty óner kórsetsin desek, álemniń ozyq tájirıbelerin, baǵdarlamalaryn jan-jaqty úırenip, ıgergenimiz jón. Qazirde sport ǵylymy aýadaı qajet baǵyt. Erteń akademııa túlekteri sporttyń ár baǵytynda óz tájirıbesin qoldanady. Akademııada bakalavratynda deneshynyqtyrý muǵalimderinen bastap, sport túrlerine jeke-jeke mamandanǵan jattyqtyrýshylar oqıdy. Keleshekte boks, kúres, hokkeı, dzıýdo, fýtbol, taǵysyn-taǵy sport túrleri boıynsha arnaıy maman daıarlaıtyn oqý oryndary kóbeıýge tıis. Sport ǵylymy, sport menedjmenti, sport medısınasyna ozyq mamandar qajet. Sonda ǵana el sportynyń álemdik arenada básekege qabileti artady, dedi E.Myrzabosynov.
Halyqaralyq seriktestermen birlesip ázirlengen EMVA baǵdarlamasy sport menedjerleriniń áleýetin arttyrýǵa, jańa satyǵa kóterýge kómektesedi. Sport mekemelerin basqarýdyń jańashyl ádis-tásilderi salaǵa birte-birte engiziledi. Saıasat Nurbek osy jóninde keńinen aıtyp berdi.
– Qazir sport salasy damyp jatyr. Biraq bizde kásibı menedjerler az. Sport – keshendi sala, onyń baǵyttary sport medısınasy, sport menedjmenti, sport farmakologııasy bolyp jalǵasa beredi. EMVA baǵdarlamasy arqyly sheteldik ýnıversıtettermen baılanys ornattyq. Basshy kadrlardyń shetelde tájirıbe almasýyna kóńil bólindi, oqý baǵdarlamalary pysyqtaldy. Osy arqyly sport federasııalary, ulttyq quramalar kásibı mamandanǵan menedjerlermen tolyǵady. Qazir ulttyq sport qarqyndy damyp jatyr, federasııalar quryldy. Sportshylardy halyqaralyq deńgeıge shyǵarý degen tipten bólek jumys. Osy turǵyda sport salasyna menedjer daıarlaý, sporttyq medısınany damytý asa mańyzdy. Bıyl jeltoqsanda Ulttyq sport ýnıversıteti ashylady degen aqjoltaı habarymyz bar. Ýnıversıtette sport medısınasy, sport farmakologııasy, sporttaǵy ǵylym syndy baǵyttar qamtylady, dedi S.Nurbek.
Dene shynyqtyrý jáne buqaralyq sport akademııasynda oqýǵa Ǵylym jáne joǵary bilim mınıstrligi jyl saıyn grant qarastyrady. Budan ózge, Shákárim ýnıversıtetinde Polshanyń úzdik ekonomıka jáne sport menedjerlerin daıarlaıtyn ýnıversıtetiniń fılıaly ashylǵan. Iаǵnı joǵaryda aıtqandaı, EMVA – sportty damytýǵa arnalǵan baǵdarlamalardyń tek bir baǵyty ǵana. Baǵdarlamamen bir jyl oqyp, dıplom alǵan túlekterdiń biri, Aqtóbe qalasynyń turǵyny, sambodan, ámbebap jekpe-jekten álem chempıony Raısa Baılıeva:
– Bapkerlikpen jastaıymnan aınalysamyn. Kásibı sportpen uzaq jyl aınalystym, quqyq qorǵaý salasynda jumys istedim, qoǵamdyq jumystarǵa aralastym. Dene shynyqtyrý jáne buqaralyq sport akademııasynyń arqasynda EMBA baǵdarlamasy boıynsha oqydyq. Oqý barysynda kóp nárseni úırendik. Shvesııa, Polshaǵa baryp, sheteldik tájirıbemen tanysyp qaıttyq. Qazir Aqtóbe qalasyndaǵy №1 mektepte dzıýdo, sambo úıirmesinen sabaq beremin. Balalardy buqaralyq sportqa baýlýǵa kúsh salyp kelemiz. Osy jyldar aralyǵynda sambo, ámbebap jekpe-jekten álem, Azııa chempıonatynyń júldegerlerin tárbıeledik. Qazir mektepte 45 bala sportpen shuǵyldanady. Keleshekte sportpen myqtap aınalysyp, úlken jetistikke jetetin balalar shyǵady dep úmittenemiz, – deıdi.
Astanadaǵy Dene shynyqtyrý jáne buqaralyq sport akademııasy 2021 jyly Dene shynyqtyrý men sportty damytýdyń 2026 jylǵa deıingi tujyrymdamasy negizinde ashylǵan. Qazir deneshynyqtyrý pedagogterin, sport túrleri boıynsha jattyqtyrýshylardy, sport menedjerlerin, sport psıhologteri men salanyń basqa da kadrlaryn daıarlaıdy. Munda bakalavrıatta, magıstratýrada oqýǵa múmkindik bar.
Oqý ornynyń akademııalyq máseleler jónindegi prorektory Tursynzada Qýanǵalıeva akademııada sport menedjmentine 150-den astam adam oqyp jatqanyn aıtty. Osy joly 39 túlek dıplom alsa, basqasy baǵdarlamany jyl sońyna deıin aıaqtaıdy. Aıta keterligi, olar sport salasyndaǵy túrli uıymdardyń, mınıstrliktiń top menedjerleri. EMBA baǵdarlamasy basshylarǵa kóshbasshylyqty, strategııalyq josparlaýdy, qarjyny tıimdi basqarýdy úıretýge arnalǵan. Akademııa osy qos dıplomdy baǵdarlamany ázirleý maqsatynda Polsha, Belgııa, Fransııamen baılanys ornatqan. Baǵdarlama bıznes baǵytyna jaqyn bolǵandyqtan, memleketten grant qarastyrylmaǵan. Ár adam oqý aqysyn óz qaltasynan tóleıdi. Akademııa tek sheteldik taǵylymdamany qarjylandyrady.
