О́tken jyly jalpy uzyndyǵy 2 shaqyrym bolatyn jergilikti mańyzy bar avtomobıl joldarynyń 24 ýchaskesine tasqyn sýdan nuqsan kelip, oblys aýmaǵyndaǵy 3 kópir búlindi. Sonyń ishinde Kindikti aýylyna aparatyn joldaǵy kópir qaıta qalpyna keltirildi. Tassaı aýylyndaǵy kópirge jobalyq-smetalyq qujattama ázirlenip, Bozaı aýylyndaǵy kópirdi qalpyna keltirý josparlanǵan.
Avtomobıl joldaryndaǵy sý tasqynynyń saldaryn joıý barysynda «Semeı joldary» JShS merdigerlik uıymy «Aqsýat – Shybyndy – oblys shekarasy» jol ýchaskesinde 6 sý ótkizý qurylysyn ornatty. Búginde yqtımal tótenshe jaǵdaıdyń aldyn alý maqsatynda 70 arnaıy tehnıkasy bar 7 apattyq brıgada táýlik boıy kezekshilik atqarýdy bastady. Qajetti materıaldar qory jasaqtalyp, 1000 tekshe metr qum, 1047 tekshe metr qum-qıyrshyq tas qospasy, 260 tekshe metr tasty topyraq jınaldy. Motopompalar, kúrek, etik, basqa da jabdyqtar satyp alynyp, qutqarýshylardyń ázirligi pysyqtaldy.
2024 jylǵy sý tasqynyn taldaý negizinde «Qaraǵandy – Aıagóz – Tarbaǵataı – Boǵas» avtojoldarynyń ýchaskelerinde sý ótkizý qubyrlaryn jóndeý josparlanǵan. Jumysty aıaqtaý 2025 jylǵy tamyzǵa josparlanyp otyr. Buǵan qosa, mol sýly Ertis ózeniniń sý deńgeıine kúndelikti monıtorıng júrgizilip, jaǵdaı baqylaýǵa alynǵan. Barlyq is-sharalardy iske asyrý sý basý qaýpin azaıtýǵa, sý tasqyny kezeńinde jol ınfraqurylymynyń qaýipsizdigin, kóliktiń úzdiksiz qozǵalysyn qamtamasyz etýge baǵyttalǵan.
SEMEI
