ALǴYS HAT “Egemen Qazaqstan” respýblıkalyq gazeti” aksıonerlik qoǵamynyń prezıdenti Saýytbek ABDRAHMANOVQA

Qaz-qalpynda Sizge sálem joldaımyn. Meniń “Zamandasqa hat” degen maqalamdy gazettiń 22 maýsym kúngi nómirinde jarııalap, meniń óz oıymdy gazet oqyrmandaryna jetkizgendikterińiz úshin shyn júrekten alǵys aıtamyn. Sol maqalaǵa baılanysty ba­symnan keshken úlken qýanyshymdy sizderge jáne habarlaımyn. Gazet shyqqan kúni keshki saǵat 19.20-da páterimdegi telefon shyl­dyrlady. Trýbkany kótersem – Astanadan, Prezıdent Saraıynan. – Sizben qazir Prezıdent sóılesedi,– dedi Prezıdenttiń kómekshisi Nurlan degen jigit. Men ne derimdi bilmeı, sasqa­laq­tap qaldym. Prezıdent telefon so­ǵa­dy degen úsh uıyqtasam, oıymda joq. Lezde trýbkadan Nursultan Ábish­ulynyń tanys daýysy estildi. Sálemdestik. – Búgingi “Egemen Qazaqstan­nan” “Zamandasqa hat” degen maqa­la­ńyzdy bastan-aıaq oqyp shyqtym. Siz hatyńyzdy zamandastaryńyzǵa arnaǵan ekensiz. Sol zamandas­ta­ry­ńyzdyń biri retinde О́zińizge telefon soǵyp, alǵysymdy bildireıin dep otyrmyn. Sizge kóp rahmet. Sodan keıin Prezıdent kúldi. Kúldi de: – Sizge búgin bul maqalańyzǵa baılanysty neshe adam telefon soqty? – dep surady. – Tórt adam. Siz besinshisiz, Nureke, – dedim men. – Ony surap otyrǵanym, Siz maqalańyzda bıylǵy 9 mamyr – Jeńis kúni ózińizge 137 adamnyń telefon soqqanyn aıtyp, olardyń báriniń aty-jónin kúndeligime túrtip qoıdym depsiz. Meniń de atym Siz­diń kúndeligińizge kirsin dep telefon so­ǵyp otyrmyn, – dedi Nurekeń ázildep. – Rahmet, Nureke. Onda Sizdi de jazyp qoıaıyn, – dedim men Pre­zı­dent áziline ázil qosyp. Sodan keıin ol kisi sózin ári qaraı jalǵady. – Maqalańyzdyń bas jaǵynda Siz: “Prezıdentti maqtaı berýdiń ke­re­gi joq. Onyń isin jaqtaı bilý kerek”, depsiz. Onyńyz durys. Men de jigitterge: “Meni sózben emes, ha­lyq úshin istegen isterińmen maqtań­dar. Memleketimizdiń nyǵaıýy úshin aıanbaı, adal qyzmet isteńder. Maǵan sen­derdiń meni myń ret maqtaǵan­da­ry­ń­nan, bir mektep salǵandaryń neme­se bir kásiporyn ashqandaryń qymbat”, deımin”, – dedi Prezıdent. Odan keıin áńgimemiz basqa taqyrypqa aýysty. – Maqalada aıtylǵan  batańyzǵa jáne rahmet. Búkil halyqtyń qamyn oılaǵan ondaı áleýmettik batany ómir­diń aýyr ótkelderinen ótken Siz­der sııaqty ardaqty aǵalar ber­me­gende, kim beredi?! Durys! Jer­gi­lik­ti ákimderdiń kemshilikterin kór­se­tip, urysqanyńyz da jón. Sizder tez­ge salmaǵanda kim túzetedi olardy? Budan soń Prezıdent meniń densaýlyǵymdy surady. – Shaldarsha shapqylap júrip jatyrmyn, Nureke, – dedim men. – Sonyńyz durys. Qarttar ha­lyq­­tyń qazynasy ǵoı. О́zderińiz sııaq­ty aqylshy aǵalardyń kóp bolǵanyna ne jetsin! Osy shabysyńyzdan tanbańyz, endeshe. Aman bolyńyz, Ázeke, – dep Prezıdent sózin aıaqtady. Bir-birimizge jaqsy tileý tilep, qosh aıtystyq. Oıda joqta bolǵan Prezı­dent­pen bul áńgimege meniń de,  bala-shaǵamnyń da qýanyshynda shek bolmady. – Sizge Prezıdent ras telefon soqty ma? Ol kisiniń О́zimen sóılestińiz be? – dep nemerem Álııa qaıta-qaıta surady. Prezıdentpen sóılesý baqyt qoı. Biraq, aýzyńa kerekti sóz túspeı qalady eken. Meniń telefonymdy taýyp, Prezıdentpen jalǵastyrǵan Qasym­bekov Mahmutqa jáne rahmet. Meni osyndaı zor qýanyshqa jet­kizgeni úshin “Egemen Qazaq­stanǵa” rahmet aıtyp, sizge alǵys hat joldap otyrmyn, Saýytbek inim. Olaı deıtinim – maǵan osy maqalany jazýǵa tapsyrysty ózińiz bergen edińiz ǵoı. Sálemet bolyńyz. Aǵalyq ystyq yqylaspen, Ázilhan NURShAIYQOV, “Egemen Qazaqstan” gazetiniń qart avtory, burynǵy qyzmetkeri. 23.06.2010 j. ALMATY.