Fotolar: primeminister.kz
Týrızm jáne sport vıse-mınıstri Mıras Tólebaev zańnamanyń oryndalýyn qamtamasyz etý úshin vedomstvo oblystyq jáne qalalyq ákimdiktermen, sondaı-aq Mádenıet jáne aqparat mınıstrligimen birlesip syrtqy jarnama men otandyq BAQ-qa turaqty monıtorıng júrgizetinin atap ótti. Osy jumystyń nátıjesinde 1,6 myńnan astam bılbord alynyp tastaldy. 2024 jyly «Kıbernadzor» aqparattyq júıesine zańsyz qumar oıyndar men bás tigýlerdi jarnamalaıtyn 10 myńnan astam saıt buǵattalýǵa engizildi.
«Azamattar kóshede nemese BAQ-ta zańsyz býkmekerlik jarnamany baıqasa, mınıstrlikke aryz jaza alady. Dálelder jetkilikti bolǵan jaǵdaıda, mınıstrlik tıisti oryndarǵa suraý joldap, ákimshilik quqyq buzýshylyq týraly is qozǵaý úshin qajetti materıaldardy jınaıdy», dep túsindirdi Mıras Tólebaev.
Vıse-premer múddeli memlekettik organdar men oblys ákimdikterine zańnama talaptarynyń oryndalýyn jiti qadaǵalaýdy tapsyrdy.
«Ruqsat etilmegen oryndarda jarnama jasaýǵa jol berilmeýi tıis. Myńdaǵan saıttar buǵattalǵany týraly esep berildi. Alaıda, ǵalamtorda býkmekerlik keńselerdiń jarnamasy áli de bar. Bul rette salalyq mınıstrlikter monıtorıng jumysyn kúsheıtýi qajet», dep atap ótti Tamara Dúısenova.
Engizilgen shekteýlerge sáıkes býkmekerlik keńseler men totalızatorlardy jarnamalaýǵa ashyq keńistikterde, ǵımarattardyń qasbetterinde, kólik quraldarynda jáne syrtqy konstrýksııalarda, býkmekerlik keńselerdiń nemese totalızatorlardyń ornalasqan jerlerin qospaǵanda, sport ǵımarattarynyń ishinde jáne sportshylardyń jabdyqtarynda tyıym salynady. Býkmekerlik keńselerdiń logotıpteri men saýda belgilerin basqa bıznesti jarnamalaýda jáne t.b. paıdalanýǵa bolmaıdy.
Aıta ketelik, Ákimshilik quqyq buzýshylyq kodeksiniń 455-babyna sáıkes, býkmekerlik keńselerdiń jarnamasyn taratqandar úshin 236 myńnan 1,5 mln teńgege deıin aıyppul qarastyrylǵan.
