Foto: Aqorda
Qasym-Jomart Toqaevtyń sózinshe ekinshi deńgeıdegi bankterdiń resýrstaryn úkimettik baǵdarlamalarǵa, atap aıtqanda, iri ınfraqurylymdyq jobalardyń qurylysy men jańǵyrtý jumysyna tartýǵa bolady jáne tartý kerek degen másele kóp aıtyldy. Memleket bóletin qarajatty kezeń-kezeńimen nesıe mólsherlemesin sýbsıdııalaýǵa qaraı baǵyttaý kerek. Bul qarjylandyrý kólemin birneshe ese ulǵaıtyp, bankterdiń aqshasyn ekonomıkalyq aınalymǵa qosýǵa múmkindik beredi.
«2017 jyldan bastap 2020 jylǵa deıin birqatar iri bankke memleket tarapynan, sonyń ishinde Ulttyq qor esebinen 15 jyl merzimge qarjylaı qoldaý kórsetilgenin bilesizder. Bul kómek bank aksıonerleri de ortaq jaýapkershilikke ıe bolady degen talappen berildi.
Keıbir bankter óz shyǵyndaryn áldeqashan ótegen. Biraq memlekettiń ıeligindegi qarjyny qaıtarýǵa asyqpaıdy. Tipti ony joǵary paıyzben táýekeli az memlekettik qarjy quraldaryna salyp, kepildi tabys taýyp otyr. Úkimet pen Ulttyq bankke shara qabyldaýdy tapsyramyn.
Bir nárseni atap ótkim keledi: bankter Úkimettiń, sonyń ishinde halyqtyń jaýy emes. Biraq dıalog negizindegi ádil seriktestik ornaýǵa tıis. Kezinde sizderge kómektestik, endi sizderdiń kezekterińiz keldi», dedi Prezıdent.
Sonymen qatar, Prezıdenttiń aıtýynsha Bıznestiń kepilge qoıatyn múlkiniń bolmaýy naqty sektordy kredıtteýge kedergi keltiredi. Sondyqtan zaımdy kepildendirý quraldaryn kóbeıtý qajet. Úkimet salalyq damý ınstıtýttarymen birlesip, kepildik qoryn qurý máselesin pysyqtaýy kerek.
«Bankterdiń, korporasııalardyń, ortalyq jáne jergilikti bılik organdarynyń jyl saıynǵy jarnasy esebinen qarjylandyrylatyn mundaı qorlar birqatar elde óz tıimdiligin kórsetti. Sondaı-aq ekonomıkalyq qaıtarymy joǵary strategııalyq jobalardy júzege asyrǵan kezde Biryńǵaı zeınetaqy jınaqtaýshy qorynan naryq sharttaryna saı «uzaq merzimge beriletin» qarjyny anaǵurlym belsendi tartýǵa bolady», dedi Memleket basshysy.
