Foto: facebook/Elnar Berıkbaev
Elnar Berikbaevtyń aıtýynsha, azamattardy áleýmettik qoldaýǵa baǵyttalǵan memlekettik bastamalar men áleýmettik tólemderdiń ulǵaıýy ózin-ózi qamtamasyz ete alatyn keıbir adamdardyń osy qarajatty alýǵa umtylýyna eriksiz ákeledi.
«Qasym-Jomart Kemeluly kómek shyn muqtaj jandarǵa ǵana kórsetilýi kerek ekendigin atap ótti. Memleket basshysy Qazaqstanǵa aqsha tabý úshin keletin eńbek mıgranttaryn mysalǵa keltirip, masyldyqty arttyrmaýǵa shaqyrdy. Prezıdent jastardy eńbeksúıgishtikke, zeıindilikke, otansúıgishtikke tárbıeleýdiń mańyzdylyǵyn birneshe ret atap ótti», dedi sarapshy.
Osy jyldy Memleket basshysy «Jumysshy mamandyqtary jyly» dep jarııalaǵyny bárimizge málim. Jumysshy mamandyqtarynyń bedelin arttyrý, tehnıkalyq jáne kásiptik bilim berýdi reformalaý maqsatynda Úkimet «Jumysshy mamandyqtary jylyn» ótkizý boıynsha respýblıkalyq jospardy bekitti.
Osy rette sarapshy elimizdiń barlyq óńirlerinde Jumysshy mamandyqtary jylyna arnalǵan josparlar ázirlenip, onyń ishinde jumysshy mamandyqtardyń bedelin arttyrý, kadrlardy daıarlaý sapasyn arttyrý, jumys berýshilermen ózara is-qımyldy keńeıtý sharalary qarastyrylǵanyn tilge tıek etti.
«Bul jumysqa bıznesti keńinen tartýdy qamtamasyz etý úshin barlyq tehnıkalyq jáne kásiptik bilim berý uıymdary úshin memlekettik tapsyrys kólemi ulǵaıtylyp, teńestiriledi. О́z kezeginde ákimder kásipkerlermen birlese otyryp, óńirler úshin basym mamandyqtardy anyqtap, suranysqa ıe kadrlardy daıarlaý úshin kolledjderge baǵyt-baǵdar bere alady», dedi E.Berikbaev.
Sonymen qatar sarapshy jıynda talqylanǵan qoǵamdyq sanada quqyq tártibin saqtaý jáne quqyq buzýshylyqtarǵa «múldem tózbeýshilik» qaǵıdatyn qalyptastyrý mańyzdylyǵyna toqtaldy.
«Memleket basshysynyń aıtýynsha, shekteýler nemese aıyppuldar engizý kezinde parasattylyqty basshylyqqa alý kerek. Aıyppul – ákimshilik quqyqta eń kóp qoldanylatyn májbúrleý yqpal etý sharasy. Aıyppuldyń negizgi maqsaty – zańsyz áreketterdiń jolyn kesý jáne aldyn alý. Sonymen qatar, aıyppuldar da shamadan tys bolmaýy kerek», dedi QSZI Strategııalyq taldaý bóliminiń basshysy.
