Halyqaralyq «Alash» ádebı syılyǵy laýreatynyń bul keshi «Qarqýar» dep ataldy. Abaı atyndaǵy qazaq mýzykalyq drama teatryndaǵy shara shymyldyǵy oblys ákiminiń quttyqtaý sózimen túrildi.
«Hakim Abaı, danyshpan Shákárim, muhıt oıly Muhtarǵa qyzmet etýdi Tólegen aǵadan úırený kerek desem, artyq aıtqandyq emes. Dúnıeniń «qyzyl-jasylyna» aldanbaı, «qaqqan qazyqtaı» Qaraýylǵa baılanyp, babalar murasyn qoryp kele jatqan Tólegen Janǵalıulyna Abaı eli dán rıza! Qazaq rýhanııatynyń qaınarynan sýsyndap, Abaısha tereń tolǵanyp, uly oı, syrly sózdiń júgin arqalaǵan qarymdy qalamgerge shyn júrekten shyǵarmashylyq tabys tileımin! Mereıtoı qutty bolsyn!», dedi oblys ákimi Nurlan Uranhaev.
Shyǵarmashylyq keshte oblystyq «Darıǵa-aı» jastar teatry ártisteriniń qatysýymen, aqynnyń jan álemi men júrek tebirenisin jarqyratyp kórsetken «Qarqýar» teatrlandyrylǵan qoıylymy kórermen nazaryna usynyldy. Teatr týyndysynyń rejısseri – Mádenıet salasynyń úzdigi Juldyzbek Jumanbaı.
Aqyn Tólegen Janǵalıevti arman-ańsary aýylda júrgende alystan qol bulǵap, qalaǵa shaqyrsa da, shyǵarmashylyq kúsh-qaıratyn dáleldep Almatyǵa moıyn burǵan joq. Abaı aýdany ákimdiginde qara halyqtyń qamyn jep, bilgeninen jańylmady. Artyq sóılep, asyra silteıtinderdi qalamymen jasqap otyrǵany ras-ty.
Atom azabyn tartqan halyqtyń, sonyń ishinde Semeı jurtynyń qasiretin jyr etip, azamattyq ustanymyn tanytyp, elimen birge turysty. Zapyran qusqan halyqtyń zaryn uqtyrdy. Shyndyqqa sýarylǵan jyrlarynyń keıipkerleri polıgon azabyn tartqan adamdar men aýyldaǵy ańqaý jurt edi. Osyndaı tosyn taqyryp pen oqshaý keıipkerleri arqyly oqyrmannyń oıyn dóp basty.
Tólegen Janǵalıev 90-jyldardyń sońynda Qaraýylda «Aqsuńqar» aqyndar mektebin ashty. Mańyna óleń jazýǵa yntyq, sóz óneriniń ıesin tanyp, kıesin qurmettegen jas jetkinshekterdi jıdy. Aqyndyq óner mektebin qalyptastyrdy.
Semeıde ótken ádebı keshte mereıtoı ıesine Memlekettik keńesshi Erlan Qarınniń, Jazýshylar odaǵynyń quttyqtaý hattary tabys etildi. Keshke arnaıy qatysqan aqyn shákirtteriniń qarasy da qalyń boldy. Olar da búginde ustaz úmitin aqtap táýelsiz qazaq ádebıetiniń bir-bir ýyǵyna aınalǵan Qalqaman Sarın, Baqytjan Baıbolov, Ulan Saǵadıev, Nurjan Baıtós, Arman Sherızat, Aıdana Baıtósova, Gúlim Erbolatqyzy syndy aqyndar ekenin ataǵan jón. Aqyn-ustaz toıyna shákirtteri de qur qol kelmeı belgili ǵalymdar men jazýshylar Tursyn Jurtbaı, Rollan Seısenbaev sııaqty jandardyń Tólegen haqyndaǵy lebizderi men arnaýlary men arnaıy jazylǵan ádebı maqalalar toptasqan «Shyńǵystaýdyń bir shyńy» atty kitapty tabys etip, tusaýyn kesti.
Saltanatty is-sharada sahnaǵa kóterilgen talantty aqyn Qalqaman Sarın qara óleńniń aýylyn kúzetken aqyn Tólegen Janǵalıev shyǵarmashylyǵy jaıynda pikir bildirip, jazýshy, halyqaralyq «Alash» ádebı syılyǵynyń laýreaty Dáýlet Seısenuly Jazýshylar odaǵynyń tóraǵasy Mereke Qulkenovtyń quttyqtaýyn jetkizdi.
SEMEI
