Sýret: gazeta.ru
Abaı oblysynyń Polısııa departamentine qarasty bólimniń basty mindetine zardap shekkenderge jedel kómek kórsetý, tıimdi sharalar qoldanýmen qatar álimjettiktiń aldyn alý máselesi de kirip otyr. Jańadan qurylǵan bólim keleshekte jaza basqandardy birden jazaǵa tartýdy ǵana qarastyrmaı, keleńsiz jaǵdaıǵa tap bolǵan otbasy múshelerimen tyǵyz qarym-qatynas ornatyp, ońtaıly qyzmet atqarýdy maqsat etip otyr. Buǵan qosa atalǵan bólim zorlyq-zombylyq týraly aryz-shaǵymdarǵa der kezinde jaýap qatyp, jedel áreket etýdi, jıi qaıtalanatyn oqıǵalardyń aldyn alý men zardap shekkenderge bilikti zańgerlik, áleýmettik jáne psıhologııalyq qoldaý kórsetýdi mindet etip júkteıdi.
О́tken jyly óńirde 3 548 turmystyq quqyq buzýshylyq áreketiniń joly kesilgen. 3,5 myńnan asa adam profılaktıkalyq esepke alyndy. Bul turmystyq zorlyq-zombylyqtyń kún sanap órship turǵanynyń, udaıy kúrestiń ózektiliginiń aıqyn dáleli bolsa kerek. Jańa qurylǵan bólim daǵdarys ortalyqtarymen, medısınalyq mekemelerimen, qoǵamdyq uıymdarmen tyǵyz jumys isteıdi. Bul jábirlenýshilerge keshendi kómek kórsetýdiń júıesin qurýǵa jáne ár kezeńde qoldaýdy qamtamasyz etýge múmkindik beretinin aıtady mamandar.
«Bul bólimniń qurylýy – jaı bastama emes, bul óńirimiz úshin asa mańyzdy qadam. Árbir zorlyq-zombylyq oqıǵasynyń artynda naqty adam taǵdyry tur. Sondyqtan bizdiń maqsatymyz – tek áreket etý emes, osyndaı jaǵdaılardyń aldyn alý. Qazir bólimdi jasaqtaý jumystary júrgizilip jatyr: shtat 36 ınspektordan turady jáne olar osy mańyzdy mindetti oryndaýǵa tolyq daıyn bolady», deıdi bólim bastyǵy, polısııa podpolkovnıgi Vıtalıı Kaverın.
Bólimniń jedel jelisi táýlik boıy jumys atqaryp, zorlyq-zombylyqqa tap bolǵandardyń nemese osyndaı jaǵdaıdan qulaǵdar árbir azamattyń aryz-shaǵymyn qabyldaı alady.
Abaı oblysy
