Mańyzdy sharalardyń biri, elimizdegi eń iri Buqtyrma kópiriniń ashylýy – tolyqtaı otandyq ınjenerler men jumysshylardyń eńbegi. Kópir oblys turǵyndarynyń turmys-tirshiligin ońtaılandyryp, kóptegen salanyń damýyna lepti úlesin qosatyny sózsiz.
– Prezıdenttiń Katonqaraǵaı men Zaısanda áýejaı salý týraly tapsyrmasy óńirdiń damýyna úlken serpin berdi. Sonymen qatar kórshi eldermen ózen baılanysyn jandandyrý aıasynda keme kóligin qalpyna keltirýdi de josparlap otyrmyz, – dedi oblys ákimi Ermek Kósherbaev.
Eger bul joba júzege asyp jatsa, Shyǵys Qazaqstan túkpirdegi tuıyq aımaqtan kólik-logıstıkalyq habqa aınalyp, Reseı men Qytaı arasyndaǵy eń qysqa, ári jyldam kólik baǵytyna ıe bolady. Jalpy, aımaqtyń barlyq áleýmettik-ekonomıkalyq ındıkatorynda oń ózgeris bar. 2022 jyly oblys bıýdjeti 366 mlrd teńgeni qurasa, byltyr bul kórsetkish 580 mlrd teńgege jetti. 2022 jyly damý bıýdjeti 90 mlrd bolsa, byltyr 130 mlrd teńgeni qurady. Oblys ákiminiń aıtýynsha, jergilikti salyq jaqsy dınamıka kórsetkenimen, 36 paıyzdan aspaıdy. Sol turǵyda bul baǵytta qosymsha kiris kózi algorıtmin kúsheıtý kerek.
Oblys ekonomıkasynyń negizgi bóligi, shamamen 40%-y ónerkásipke tıesili. О́ńirde shaǵyn jáne orta bıznesti damytý arqyly ekonomıkany ártaraptandyrý qolǵa alynǵan. Osy baǵytta halyqqa laıyqty jumys beretin, tabys ákeletin, qomaqty salyq túsimderin qamtamasyz etetin salalar bekitildi. Tutyný men óndiris balansyn saraptap, kórshi oblystar men memleketterdiń naryǵyn zertteı kele, tabıǵı-klımattyq jaǵdaılardy eskere otyryp, eksporttyq áleýetke qajetti túzetýler engizildi.
Barlyq qala, aýdanda ekonomıkalyq ósý núkteleriniń bes jyldyq jospary, aýyldyq okrýgterge qatysty jol kartalary bekitildi. Keıingi bir jylda 46 jańa óndiris iske qosyldy. Onyń ishinde jalpyulttyq pýl aıasynda 45 mlrd teńgege 10 joba jasaldy.
Jumysshy mamandyqtary jyly aıasynda kadr tapshylyǵyn azaıtý maqsatynda oblysta qurylys, aýyl sharýashylyǵy, avıasııa, energetıka, sý kóligi salalaryna qatysty túrli baǵdarlamalar qarastyrylyp jatyr. «Otbasy bankimen» birlese otyryp, «Shyǵys mamany» qoljetimdi ıpotekasy iske qosyldy.
– Ekonomıkanyń tabıǵı resýrstarǵa táýeldiligin azaıtý jónindegi Úkimet saıasaty aıasynda jer qoınaýy baılyqtarynyń memleket pen halyqqa barynsha paıda ákelýin qamtamasyz etý baǵytynda da jumys atqarylyp jatyr. Eki jyl ishinde kásiporyndarmen jasalǵan 14 kelisimshart negizinde áleýmettik tólemder 34 ese kóbeıdi, – deıdi aımaq basshysy.
«Aýyldyq densaýlyq saqtaýdy jańǵyrtý», «Jaıly mektep» ulttyq jobalary áleýmettik nysandardy salýdyń jańa standarttaryn engizdi. Bul jumystar ásirese aýyldyq jerlerde myqtap qolǵa alyndy. 2026 jylǵa qaraı halyqty 100% sapaly aýyzsýmen qamtamasyz etý jumystary da ret-retimen júzege asyrylyp jatyr. Elimizdiń sý resýrstarynyń 40 paıyzy Shyǵys Qazaqstanda. Byltyrǵy qıyn jaǵdaılarda aldyn ala jasalǵan sharalardyń nátıjesinde eldi mekender topan sýdan zardap shekken joq. Shyǵys orman qoryna da baı ekenin eske salsaq, tabıǵı órttiń aldyn alý, boldyrmaý da – basty nazarda. Bul turǵyda sońǵy eki jylda tıisti qyzmettiń tehnıkalyq bazasy kúsheıtildi.
Oblys basshysynyń aıtýynsha, halyqtyń bastamasymen «О́skemen tynysy» qoǵamdyq ekobıýrosy uıymdastyrylyp, ekoproblemalar kún tártibinen túspeıtin kúlbilteli másele bolyp belgilendi. «Taza Qazaqstan» ulttyq jobasy men «Jasyl aımaq» óńirlik baǵdarlamasy da azamattardyń ekologııalyq mádenıetin kóterýde erekshe ról atqardy. Bul aksııaǵa ásirese jastar belsene qatysty.
Shyǵys Qazaqstan oblysy
