Sýret: oligarh.media
Jıynda agenttik tóraǵasy Darhan Jazyqbaı Memleket basshysy Qasym-Jomart Toqaevtyń memlekettik qyzmetti jańǵyrtýda alǵa qoıǵan mindetterdiń servıstik jáne adamǵa baǵdarlanǵan qaǵıdattary negizinde júzege asyrylyp jatqanyn jetkizdi.
– «Memlekettik qyzmet týraly» jańa zań jobasyn ázirledik. Jańa zań memlekettik qyzmettegi eńbek qatynastarymen qatar qoǵam men memlekettik apparattyń ózara is-qımylynyń jańa paradıgmasyn retteıdi. Sondaı-aq irikteý júıesin jańǵyrtý, erte kásibı baǵdarlaý tetikterin engizý, gorızontaldy ósý múmkindikterin qarastyrý, qyzmetshilerge áleýmettik kepildikterdi jaqsartý máselelerin qaıta qaraý kózdelgen. Zań jobasy aıasynda 70-ke jýyq zańǵa táýeldi normatıvtik-quqyqtyq aktiler jańa redaksııada daıyndalady, – dedi ol.
Byltyr kórsetiletin memlekettik qyzmetterdi baqylaý is-sharalarynyń qorytyndysy nátıjesinde 150 myńnan asa buzýshylyq anyqtalǵan. Onyń 37%-y qashyqtan júrgizilgen monıtorıng arqyly belgili boldy.
– Anyqtalǵan buzýshylyqtardyń 61,3%-y nemese 92 myń fakti qyzmet kórsetý tártibin buzýmen baılanysty bolyp otyr. Buzýshylyqtar boıynsha qyzmet berýshi 1 600-den asa adam tártiptik jaýapkershilikke, 458 laýazymdy tulǵa ákimshilik jaýapkershilikke tartyldy. Memleket kirisine aıyppul túrinde 40,7 mln teńge óndirildi. Baqylaý sharalary nátıjesinde 1 918 qyzmet alýshynyń buzylǵan quqyqtary qalpyna keltirildi, onyń 837 nemese 44%-y qashyqtan monıtorıng arqyly qalpyna keltirildi. Máselen, 325 adamǵa jer ýchaskeleri berilip, 143 ýchaskeniń nysanaly maqsaty ózgertildi, 284 sáýlet-josparlaý tapsyrmasy túzetildi, – dedi D.Jazyqbaı.
Jıynǵa Prezıdent Keńsesiniń bastyǵy Baqytjan Sarıev, Prezıdent Ákimshiliginiń laýazymdy tulǵalary, Parlament depýtattary, Memlekettik qyzmettiń óńirlik haby, qoǵamdyq uıym ókilderi, agenttik janyndaǵy alqaly organdardyń músheleri qatysty.
– Prezıdent Qasym-Jomart Toqaev memlekettik qyzmettiń tıimdiligine erekshe mán berip otyr. Sebebi memlekettik qyzmettiń qoǵamdaǵy róli aıryqsha. Bul salany jetildirip, jańǵyrtý – agenttiktiń basty mindeti. Prezıdenttik jastar kadr rezervin jasaqtaý isi jalǵasyn taýyp keledi. О́ıtkeni ol tıimdiligin kórsetip jatyr. Búginde rezerv músheleri memlekettik qyzmet pen ulttyq kompanııalardyń jaýapty laýazymdarynda qyzmet etip otyr. Osy jylǵa josparlanǵan kezekti irikteýdi joǵary deńgeıde ótkizý qajet. О́ńirlik kadr rezerviniń múmkindikterin keńinen qoldanǵan jón. Qazirgi kezde rezervke alynǵan 537 adamnyń 110-y ártúrli laýazymdarǵa taǵaıyndalǵan. Osyǵan baılanysty agenttiktiń aýmaqtyq departamentteri ákimdiktermen birlesip, pármendi sharalardy qabyldaýy qajet, – dedi Prezıdent Keńsesiniń bastyǵy Baqytjan Sarıev.
Sondaı-aq memlekettik qyzmetshilerdiń Birikken Arab Ámirlikterinde, Eýropada, Túrkııada, Ázerbaıjanda jáne basqa elderde biliktilikti arttyrý aıasynda tájirıbe almasýyna múmkindik jasalǵan. D.Jazyqbaı agenttik memlekettik basqarý jáne memlekettik qyzmet salasyndaǵy ozyq álemdik tájirıbeni zerdeleı otyryp, sheteldik áriptestermen yntymaqtastyqty keńeıtýdi, ǵylymı zertteýler komponentin kúsheıtýdi jalǵastyratynyn jetkizdi.
