Eldiń áleýmettik-ekonomıkalyq turǵyda óristeýi sol qoǵamdaǵy adamı faktormen tikeleı baılanysty. Jan-jaqty damyǵan, óz isin jetik biletin qabiletti azamattar tutas memlekettiń ilgerileýine úles qosa alady. Ári bul mamandardy qoǵamda, ásirese jastar arasynda meılinshe nasıhattaý kemel keleshektiń qabyrǵasyn qalaǵanmen teń.
Prezıdent Qasym-Jomart Toqaev 2025 jyldy «Jumysshy mamandyqtary jyly» dep jarııalady. Osylaısha elde bıyl qurylys, aýyl sharýashylyǵy, ónerkásip syndy qarapaıym eńbek adamdaryna erekshe kóńil bólinedi. Osy maqsatta «Jastar rýhy» jastar qanaty Qostanaıdyń joǵary oqý oryndary men kolledj stýdentterin jıyp, dıalog alańyn uıymdastyrdy. Kezdesýde jumysshy mamandardy nasıhattaý, óndiris salasyn jańǵyrtý, sheteldik ınvestısııalar tartý jáne zamanaýı jabdyqtardy engizý jaıy talqylandy.
– Stýdentter qazir osy jumysshy mamandyqtardy oqı otyryp, dıplom alǵan soń óz mamandyǵy boıynsha qyzmet etýi úshin osyndaı alań uıymdastyryp otyrmyz. Bizdiń osy jylǵa qoıǵan maqsat – Memleket basshysy bekitken jumysshy mamandyqtarynyń mereıin asyrý, olardyń qyzmetin qoǵamda keńinen tanytý úshin is-sharalardy kóptep ótkizý, – dedi «Jastar rýhy» Qostanaı oblystyq fılıalynyń tóraǵasy Arýjan Sársembaeva.
Spıker retinde shaqyrylǵan dánekerleý sehynyń menedjeri Dmıtrıı Parfenov jumys berýshilerdiń jastarmen ózara is-qımylyn jaqsartýǵa kóńil bólý kerek ekenin aıtyp qaldy.
– Jumysshy mamandyqtaryna bilim berý júıesine, jastardy óndiriske tartý boıynsha jumys berýshilerdiń tásiline de úlken nazar aýdarý kerek. Sebebi qazirgi óndiris alańdary burynǵyǵa qaraǵanda áldeqaıda zamanaýı jáne belgili bir biliktilik daǵdylary men bilimdi qajet etedi, – dedi D.Parfenov.
Aqtaýda da «Bir tolqynda» dıalogtyq alańy uıymdastyrylyp, kezdesýde týrızm jáne qoǵamdyq tamaqtaný salalarynyń mańyzdylyǵyna toqtaldy.
– Bizdiń ekonomıkamyz jumysshy mamandyqtaryna táýeldi. Bul tek dánekerleýshiler, montajshylar nemese qurylysshylar emes, sondaı-aq qoǵamdyq tamaqtaný salasynyń ókilderi, aspazdar, basqarýshylar da bar. Aqtaý týrıstik óńir bolyp esepteletindikten, bul sala mańyzdy. Sol sebepti stýdentterge qoǵamdyq tamaqtaný jáne qonaqúı bıznesin basqarý salasynda jumys isteýdiń artyqshylyqtaryn túsindirgen restoratordy shaqyrdyq, – dedi «Jastar rýhy» Mańǵystaý oblystyq fılıalynyń tóraǵasy Abzal Marat. Al О́skemende qatysýshylar jańa oqý baǵdarlamalary men tehnologııalardyń damýyna zeıin qoıdy. Bul stýdentterge qajetti daǵdylardy tezirek meńgerýge múmkindik beredi. Shyǵys Qazaqstan oblysy kásipodaqtar birlestigi tóraǵasynyń orynbasary Aıjan Gasanova kásipodaqtardyń bul bastamany qoldaıtynyn jáne jumysshylardyń quqyqtaryn qorǵaýda belsendi jumys júrgizip jatqanyn jetkizdi.
Taraz qalasy da bul bastamadan tys qalmady. Alańda kásibı damýmen qatar, «Otbasy banki» arqyly turǵyn úı alý jáne kólik máseleleri sóz boldy.
– «Amanat» partııasy janynda jastardy qoldaý jónindegi óńirlik keńes jumys isteıdi. Bul alańda jastarǵa qatysty túrli problema kóteriledi. Biz osy kezdesýde talqylanǵan máselelerdi aldaǵy keńes otyrysynda qarastyramyz. «Bir tolqynda» bastamasy jumysshy mamandyqtarynyń elimizdiń turaqty damýy úshin mańyzdylyǵyn kórsetip, olardy jastar arasynda dáriptep, ártúrli salalardaǵy mansaptyq ósý keleshegin aıqyndaýda mańyzdy ról atqarady, – dedi Jambyl oblysyndaǵy «Amanat» partııasy jastar qanatynyń tóraǵasy Erǵalı Rústemuly.
