Foto: ulysmedia.kz
Marat Qarabaevtyń málimetinshe, bıyl qosymsha 4 myń shaqyrym aqyly ýchaskeni iske qosý josparlanǵan, bul kiristi 60 mlrd teńgege deıin ulǵaıtýǵa múmkindik beredi.
Aıta keteıik, kelesi jyly bul kórsetkish 100 mlrd teńgege deıin ósýi múmkin.
«Bul rette, osy aqyly joldardan túsken qarajattyń bir bóligin qurylys jumystaryna alynǵan qaryzdardyń paıyzdyq mólsherlemelerdi óteýge jumsaý máselesi qarastyrylyp jatyr. Bıýdjetke túsetin júktemeni azaıtý ári ózin-ózi aqtaý maqsatynda rekonstrýksııalaý jáne jóndeý jumystary aıaqtalǵan ýchaskelerde «aqyly jol» mártebesin kezeń-kezeńimen engizý jalǵasyp jatyr. Qazirgi ýaqytta búkil elimiz boıynsha uzyndyǵy 3,2 myń shaqyrym aqyly jol júıesi jumys isteıdi», dedi Marat Qarabaev.
Sonymen qatar mınıstr jol boıyndaǵy qyzmet kórsetý nysandarynyń damýyna toqtaldy. Qazirgi tańda elimizde 1 446 jol boıy servıstik nysandary jumys isteıdi, onyń 90%-y ulttyq standart talaptaryna sáıkes keledi. Bıyl bul kórsetkishti 100%-ǵa deıin jetkizý, sondaı-aq 400-den astam zamanaýı qyzmet kórsetý nysandaryn salý úshin iri ınvestorlardy tartý josparlanǵan.
«2029 jylǵa deıin 60 birlik keshendi nysandar qurylysy josparlanǵan, onyń ishinde 10 birligi osy jyly júzege asyrylady. Investısııa kólemi 120 mlrd teńge. Olarda jatyn oryn, TIR turaǵy jáne janarmaı beketteri qarastyrylǵan. Jol boıy servıstik obektilerin damytýdyń negizinde elimizde birinshi ret otandyq qonaqúıler júıesi jáne olardyń franshızasy qalyptasatyn bolady. Bul jol boıy obektileriniń tasymal prosesimen qatar, avtotýrızmniń de damýyna septigin tıgizedi», dedi Marat Qarabaev.
