- 5 sáýirde Astanadaǵy «Barys-Arenada» kásipqoı boks keshi ótedi. Jarystyń basty jekpe-jeginde orta salmaqtaǵy WBO, IBF nusqalary boıynsha álem chempıony Jánibek Álimhanuly (16-0, 11 KO) Anaýel Ngamıssengemen judyryqtasady. Anaýel Kongoda týyp-óskenimen, qazirgi kezde Fransııanyń týy astynda óner kórsetedi. 3 aqpanda 29 jasqa tolǵan sportshynyń kásipqoılar arasynda kúsh synasyp júrgenine bes jylǵa jýyqtady. Osy aralyqta 14 kezdesý ótkizip, barlyǵynda jeńiske jetti. 9 qarsylasyn nokaýtqa jiberdi. Bul jarystan álemge áıgili ESPN arnasy tikeleı reportaj júrgizedi.
- Ábý-Dabıde WTA 500 týrnıriniń tusaýy kesildi. Elimizdiń eki tennısshisi de júlde qory 1 064 510 dollardy quraıtyn jarysty ekinshi aınalymnan bastady. О́kinishke qaraı, Iýlııa Pýtınseva (№21 raketka) álemdik reıtıngte ózinen 16 saty tómen turǵan Marketa Vondroýshovaǵa (№36) ese jiberdi. Esep – 2:6, 3:6. Elena Rybakına (№5) AQSh-ta turyp jatqan ýkraınalyq Ketı Volynespen (№68) sheberlik baıqasty. Bul básekede elimizdiń birinshi raketkasy basym tústi – 2:6, 6:4, 6:4.
- «Astana» veloklýby Parsy shyǵanaǵynda ótetin eki birdeı dúbirli dodaǵa qatysady. Atap aıtsaq, búgin Omanda «Masqat klassıkasy» uıymdastyrylady. 8-12 aqpan aralyǵyna «Oman týryn» tamashalaımyz. Atalǵan jarysta «Astananyń» týy astynda Anton Charmıg, Maks Kanter, Henok Mýlıýbyrhan, Vaýt Pýls, Dıego Ýlıssı, Davıde Toneattı, Nıkolıa Vınokýrov syndy veloshabandozdar óner kórsetedi.
- Fýtboldan 2026 jyly ótetin álem chempıonatynyń irikteý týrnıri aıasynda elimizdiń quramasy 23 naýryzda syrt alańda Ýelske qarsy oınaıdy. Kúni keshe ǵana Anglııanyń Premer-lıgasynda óner kórsetetin sol komandanyń eki birdeı beldi oıynshysynyń jaraqat alyp, aldaǵy matchtarǵa qatysa almaıtyny belgili boldy. Atap aıtsaq, «Tottenhemniń» shabýylshysy Brennan Djonson jilinshigin jaraqattap alǵan, «Fýlhemniń» forvardy Harrı Ýılsonnyń aıaǵy synǵan.
- Úndistannyń Chennaı qalasynda ATR-diń «Chellendjer» sanatyndaǵy týrnıri bastaldy. Tusaýkeser kezdesýde Tımofeı Skatov chehııalyq Gınek Bartonmen kezdesip, 6:4, 6:4 esebimen jeńiske jetti. Ekinshi kezeńde ol reseılik Aslan Karasevpen kúsh synasady.
- Ispanııanyń Alıkante qalasynda bokstan «Boxam Elite-2025» týrnıriniń shymyldyǵy túrildi. Alǵashqy jarys kúni Baǵlan Kenjebek (54 kg) slovakııalyq Erık Kantonany, Jasulan Tileýmbek (57 kg) palestınalyq Vasım Abýsaldy, Beıbarys Jeksen (60 kg) majarstandyq Roland Vereshti, Jandos Qydyrálıev (63,5 kg) pen Dýlat Bekbaýov (67 kg) Ispanııanyń qos ókili – Oıer Ibarreche Konde men Ieraı Georgevıch-Barrýekony (Ispanııa), Dıas Moljigitov (75 kg) portýgalııalyq Dıogý Semedýdi, Maqsat О́tegenov (75 kg) ýkraınalyq Iýrıı Zahareevty utsa, Beknur Batyrbek (86 kg) rýmynııalyq Andreı Aredoaemen judyryqtasýdan bas tartty. Gúljaına Úbbinııazova Rýmynııanyń taǵy bir ókili Klaýdııa Nechıtadan jeńildi. Sondaı-aq soqyr jerebe elimizdiń qos óreni Elnur Súıinbaı men Aman Qonysbekovti (71 kg) tusaýkeser kezdesýde jolyqtyrdy. Bul tartys Elnurdyń paıdasyna sheshildi.
