Foto: Eńbek jáne halyqty áleýmettik qorǵaý mınıstrligi
Eńbek jáne halyqty áleýmettik qorǵaý mınıstrliginiń habarlaýynsha, Memorandýmǵa QR Syrtqy ister mınıstriniń orynbasary Roman Vasılenko men Ulybrıtanııanyń Eýropa, Soltústik Amerıka jáne shet elder isteri jónindegi memlekettik mınıstri Stıven Daýtı qol qoıdy.
Qujat taraptardyń kelesi baǵyttar boıynsha yntymaqtastyǵyn kózdeıdi:
- Ulybrıtanııa aýmaǵynda Qazaqstan Respýblıkasynyń azamattaryn ýaqytsha jumysqa ornalastyrý sharttary men rásimderi týraly aqparat almasý;
- Qazaqstan Respýblıkasynan eńbek qyzmeti úshin Ulybrıtanııaǵa jumyskerlerdi jiberetin jeke jumyspen qamtý agenttikteriniń qyzmeti týraly aqparat almasý, sondaı-aq qabyldaýshy memlekettiń zańnamasyna sáıkes olardyń qyzmetin rastaý;
- Qazaqstan Respýblıkasy azamattarynyń Ulybrıtanııa aýmaǵyndaǵy eńbek qyzmeti kezeńinde, onyń ishinde Tier-5 maýsymdyq jumys vızasy (seasonal worker visa) sheńberinde eńbek jáne áleýmettik quqyqtaryn qamtamasyz etýge jáne qorǵaýǵa baǵyttalǵan ózara yntymaqtastyq;
- Suranysqa ıe jumysshy mamandyqtary jáne Qazaqstan Respýblıkasy azamattarynyń qajetti kásiptik daıarlyǵy týraly aqparat almasý.
Aıta keteıik, osy Memorandýmǵa qol qoıý Qazaqstan men Ulybrıtanııa arasyndaǵy eńbek quqyqtaryn qorǵaý salasyndaǵy yntymaqtastyqty nyǵaıtý jolyndaǵy mańyzdy qadam.
