Alaıaqtar aıylyn jııar emes

Kúdikti byltyrǵa deıin ár jańa qatysýshy úshin 10%-dan 300%-ǵa deıin tabys beremin dep sendirgen. Salym quny marketıng­tik strategııaǵa baılanysty ­7 500-den 2 mln teńgege de­ıin ózgerip otyrǵan. Osy­laı­sha, tartylǵan qara­jat­tyń ­jalpy somasy 286 mln teńgeden asqan.

Qarjylyq tergeý júr­gizý barysynda kúdikti zańsyz jolmen alynǵan qa­ra­jatqa elıtalyq turǵyn úı kesheninen 36 mln teńge turatyn páter satyp alǵa­ny anyqtaldy. Sottyń sanksııasymen atalǵan páter­ge tyıym salyndy. Son­daı-aq sot kúdiktige «eshqaı­da ketpeý jáne tıisti minez-qulqy týraly qolhat» tú­rindegi bultartpaý sharasyn tańdady. Tergeý áli jal­ǵasyp jatyr.

Anyqtalǵandaı kúdikti­niń qyryq ótirigine se­nip, san soǵyp qalǵan 35 aza­mat jeńil tabysty kóz­degen. Basym kópshiligi – zeınetkerler. Olar óz jınaqtarynyń basqa salymshylar arasynda aq­sha bólý shemasynyń bir bóli­gine aınalatynyn sezbegen.

Al Bas prokýratýra men Ishki ister mınıstrliginiń qyzmetkerleri Qazaq­stannyń Grýzııadaǵy elshi­liginiń kómegimen bir­neshe ret alaıaqtyq jasa­ǵany úshin Qazaqstan aza­matyn qylmystyq jaýap­kershilikke tartý úshin Tbı­lısıden ekstradısııalady.

2020 jyly atalǵan tulǵa adamdar tobynyń aldyn ala sóz baılasýymen sýbsıdııa alýǵa kómek kórsetý syltaýymen Ulytaý oblysynyń 88 turǵynynyń qarajatyn ıemdenip, jalpy somasy 30 mln teńgeden asa shyǵyn keltirgen.

«Eki sybaılasy ár­túrli jazaǵa tartyldy, al kúdikti qylmys jasa­ǵannan keıin qashyp ketti, sondyqtan oǵan halyqaralyq izdeý jarııa­landy. 2024 jyly ol Grýzııa aýmaǵynda anyq­talyp, Qazaqstannyń Bas prokýratýrasynyń suraý salýy boıynsha elge qaı­taryldy. Qazir kúdikti Aqtaý qalasynyń tergeý ızo­­lıa­toryna qamaýǵa alyn­­dy. Aıyptalýshyǵa qyl­­­mys­­ty jasaǵany úshin múl­ki tár­kilenip, úsh jyldan jeti jylǵa deıin bas bos­tan­­dyǵynan aıyrý jazasy qarastyrylǵan», dedi mı­nıstrlikterdiń baspasóz qyz­meti ókilderi.

Sýbsıdııaǵa qatysty alaıaq­tyq soltústik óńirden de tirkeldi. Qarjylyq monıtorıng agenttigi Soltús­tik Qazaqstan oblysy bo­ıynsha departamenti aýyl­sharýashylyq óndiristik kooperatıvi basshysynyń 50 mln teńgeden asa sýbsıdııany zańsyz alý shemasyn anyqtady. Memleket joǵary sapaly sút óndiri­sin arttyrý jáne ımport­qa táýeldilikti tómende­tý úshin sút-taýar fermalaryn ashýdy belsendi túrde qoldap, yntalandyryp jatyr. Alaıda óndiristik kooperatıviniń basshysy 2019 jyldyń mamyrynan 2020 jyldyń naýryzyna deıingi aralyqta jalǵan qujattardy paıdalanyp, sút ónimderin óńdeýge bólingen 50 mln teńgeden asa sýbsıdııany zańsyz alǵan.

О́ndiristik shyǵyn­dar­dy rastaý úshin aýyl sha­rýashylyǵy basqar­masyna jeke kásipkerlerden shıki sút satyp alǵany úshin óz­ara esep aıyrysý týraly jal­ǵan qujattar jáne maı óndirisi týraly qasaqana jalǵan aqparattar berip kelgen. Nátıjesinde, sot sút jetkizý mámilelerin zańsyz dep tanydy. Qarjylyq tergeý aıasynda zańsyz alyn­ǵan sýbsıdııalarǵa kúdikti «Toyota land cruiser prado 150» markaly avtokólik satyp alǵany anyqtaldy. Ol múmkin bolatyn tárkileý­den jasyrý maqsatynda senim­di adamǵa rásimdelgen. Sot­tyń sanksııasymen atalǵan avtokólikke tyıym salyndy. Al kúdiktige qatysty sot eki aıǵa «qamaýǵa alý» túrinde bultartpaý sharasyn taǵaıyndady.

Kókshetaýda turmystyq tehnıkany jalǵa alýmen aınalysatyn kásipker­ler alaıaqtyń qurbany boldy. Olar WhatsApp mes­sendjerinde tehnıka týraly aqparat almasady jáne jańalyqtarmen bólisedi. Top músheleriniń biri bel­gisiz adam odan «Kärcher» markaly shańsorǵyshty jal­ǵa alyp, baılanysyn toqtatqanyn habarla­dy. Bul habarlamaǵa taǵy bir kásipker «Alteco» shoı balǵasyn jalǵa alǵan adam joǵalyp ketkenin aıtyp, jaýap berdi. Kóp uza­maı toptyń úshinshi mú­shesi alaıaqtyń qurbany bol­ǵany belgili boldy. Zar­dap shekkenderdiń úsheýi Kók­shetaý qalasynyń polı­sııa basqarmasyna alaıaqtyq áre­ketter týraly aryzben júgindi. Polıseıler dereý sotqa deıingi tergep-tekserýdi bastady. Jedel-izdestirý is-sharalary barysynda olar urlanǵan tehnıkany jergilikti lom­bard­tardyń birinen taýyp, qylmysqa qatysy bar 29 jas­taǵy er adamnyń jeke ba­syn anyqtady.

Jalpy, Bas pro­kýra­tý­ranyń resmı málimeti­­ne súıensek, byltyr elde 45 myń­nan asa alaıaqtyq dere­gi tirkelgen. Al bul bar­lyq qylmystyq istiń 34 pa­ıyzyn quraıdy.