Foto: Úkimettiń baspasóz qyzmeti
Kezdesý barysynda qatysýshylar jańa Salyq kodeksindegi ózgerister jaıyn aıtyp, onyń bızneske yqpalyn saralady.
«BNK Group LTD» JShS bas dırektory Nııazaly Beısenbaev Qazaqstanda qosylǵan qun salyǵynyń 20%-ǵa kóterilýiniń agroónerkásip keshen óndirýshilerine yqtımal áserine toqtaldy.
«Mólsherlemeniń ósýi shaǵyn jáne orta bızneske qosymsha salmaq túsiredi. Sondyqtan Úkimetke keıbir basym salalar úshin dıfferensıaldy salyq mólsherlemesin engizý, tabysy tómen kásiporyndarǵa ýaqytsha salyqtyq demalys berý jáne kóleńkeli ekonomıkamen kúresý sharalaryn kúsheıtý máselesin qarastyrýdy usynamyz. Bul kásipkerler men tutynýshylarǵa keletin teris áserdi azaıtýǵa múmkindik beredi», dedi ol.
О́z kezeginde, ulttyq ekonomıka vıse-mınıstri Baýyrjan Qudaıbergenov qazirgi ýaqytta agrarlyq sektorda sharýa qojalyqtary QQS tólemeıtinin, al zańdy tulǵalar qoldanystaǵy jeńildikterdiń arqasynda bıýdjetke tólenýge tıisti salyqtardyń tek 30%-yn ǵana tóleıtinin atap ótti. Jańa mehanızmder boıynsha olardyń eshqaısysy QQS tólemeıdi. Bul qazaqstandyq aýyl sharýashylyǵy ónimderin (kartop, qyzanaq, pııaz jáne t.b.) básekege qabiletti etýge múmkindik beredi. 10% mólsherleme qoldanylatyn salalar áli de bıznes ókilderimen talqylanyp jatyr.
«Kelesi mehanızmdi qarastyrý usynylady: jalpy belgilengen QQS mólsherlemesi – 16%, aýyl sharýashylyǵy ónimderin óndirýshilerdi QQS-dan tolyq bosatý, al keıbir salalar úshin aralyq mólsherleme kólemi 10%. Osylaısha, Úkimet usynǵan mólsherlemelerdiń dıfferensıasııasy 16%, 10%, 0% jáne tolyq bosatýdy qamtıdy», dep túsindirdi Baýyrjan Qudaıbergenov.
Kezdesý barysynda bıznes ókilderi salyqtyq júktemeniń artýyna baılanysty alańdaýshylyqtaryn bildirip, óz usynystaryn jetkizdi. Al Ulttyq ekonomıka mınıstrligi ókilderi barlyq pikir men usynystardyń nazarǵa alynatynyn málimdedi.
