Kásipkerler men sarapshylardyń da pikiri osyndaı. Shymkenttegi Danico balalar kıimi sehynyń ókilderi jastardy jumysshy mamandyǵyn meńgerýge shaqyrady. Olardyń aıtýynsha, jalpy naryqta, onyń ishinde jeńil ónerkásipte mamandar tapshylyǵy baıqalyp otyr.
«Prezıdenttiń 2025 jyldy Jumysshy mamandyqtar jyly dep jarııalaǵany osy salanyń damýyna serpin beredi dep senemiz. Memleket tarapynan qoldaý kórsetilse, ásirese, jumysshy mamandyǵynyń eńbegi nasıhattalsa, jastar osyndaı mamandyqqa kóptep keler edi dep senemiz. Sebebi, bizdiń sehtyń ózine myqty mamandarǵa degen qajettilik týyndap jatyr. Tiginshi-pishýshi degen mamandyq bar. Ony ıgerý úshin adam sol salaǵa qyzyǵý kerek. Jalpy tigin sehynda jumys kóp, bizdegi tapsyrysty oryndaýǵa sheberler jetispeıdi. Bul kásipte násibińdi tabý qıyn emes. Ásirese, qyz balalaryna arnalǵan naǵyz kásip», deıdi qurastyrýshy tehnolog Záýre Alıeva.
Bul tigin sehy 2020 jyly ashylǵan. Jańa týǵan nárestelerden bastap 3 jasqa deıingi balalarǵa arnalǵan kıimder, tósek jabdyqtary tigiledi. О́ndiriste 100 paıyz maqta matalary qoldanylady. Kásipker óz isin bastamas buryn bul salany jaqsylap zerttep alǵanyn aıtady.
«Bul salada suranys kóp ekenin baıqadyq. Sebebi, balalar tez ósedi, tez kıim aýystyrady, ata-analaryna únemi jańadan kıim alý qajet bolady. Elimizdiń patrıoty bolǵandyqtan, otandyq taýarlarymyz kóbeısin degen oımen osyndaı kásipti ashtyq. Aıyna 12 myń dana ónim daıyndap shyǵaramyz. Qazirgi tańda sehymyzda 23 adam jumys isteıdi. Jumysshylar tabýda Shymkent qalalyq kásipkerler palatasynyń kómegi kóp. 2023- 2024 jyldary eki jyl qatarynan sehymyzda 3 aılyq kýrs ótkizdik. Sodan jalpy sany 50 shákirt oqyp shyqty. Olar tigin salasynyń teorııasymen qatar tájirıbesin de meńgerip, arasynan 10 adam, mine, búginde bizdiń sehta jumys istep keledi», deıdi kásipker Núrken О́tegenov.
Jaýapty mamandar Jumysshy mamandyqtar jylynda bilim berý júıesi men mamandardyń biliktiligin arttyrýǵa jańa múmkindikter ashady degen pikirde.
«Qazirgi tańda óńirimizdegi 400-den astam kásiporyn dýaldy oqytý júıesine qatysýda. Jalpy sany 24 kolledje 8 myńǵa jýyq shákirt 25 sala men 75 mamandyq boıynsha osy júıemen qamtylǵan. Osynyń nátıjesinde stýdentter óz mamandyǵynyń teorııasyn ǵana emes, praktıkalyq biliktilikterin de úırenip, kásiporyndarda is-tájirıbeden ótip jatyr. Jalpy, Kásipkerler palatasy men qalamyzdaǵy bilim berý uıymdary bilikti mamandar ázirlep, ekonomıkanyń barlyq salasyn damytýǵa negiz bolatyn myqty ári turaqty júıe qurý baǵytyndaǵy jumysty jalǵastyra túsedi», dedi Shymkent qalasy kásipkerler palatasy dırektorynyń orynbasary Maqsat О́tkelbaev.
Aıta keteıik, 2014 jyldan bastap «Atameken» Ulttyq kásipkerler palatasy jyl saıyn óńirlerdegi kásiporyndardaǵy mamandar qajettiligine monıtorıng júrgizedi. Eńbek jáne halyqty áleýmettik qorǵaý mınıstrliginiń enbek.kz platformasyndaǵy bul monıtorıng eńbek naryǵynyń qajettiligin naqty anyqtaýǵa jáne tehnıkalyq jáne kásibı oqytý boıynsha memlekettik tapsyrysty qalyptastyrýǵa kómektesedi. Nátıjesinde bilim berý uıymdary men oqý ortalyqtary óz baǵdarlamalaryn kásiporyndardyń suranysyna oraı beıimdep, maman daıyndaýdyń sapasy arta túsedi.
