Is-sharaǵa Qazaqstan halqy Assambleıasy tóraǵasynyń orynbasary Marat Ázilhanov, Eńbek jáne halyqty áleýmettik qorǵaý vıse-mınıstri Aqmádı Sarbasov, Prezıdenttik ortalyq dırektory Baqytjan Temirbolat, memlekettik organdardyń ókilderi, «Eńbek Eri» ataǵy ıegerleri, «Assambleıa jastary» uıymynyń músheleri jáne jastar kóshbasshylary sekildi respýblıkanyń ár qıyrynan barlyǵy 150-ge tarta adam qatysty.
– Jastardy adal eńbek etýge jigerlendiretin mysaldardy jáne etnos ókilderiniń el men qoǵamnyń damýyna qosyp jatqan úlesin meılinshe keńinen nasıhattaý qajet. Biz jastardyń jobalaryna qoldaý kórsetýde, jańa múmkindikterge jol ashý maqsatynda kásiptik bilim berý mekemeleriniń stýdentterimen tyǵyz qarym-qatynas ornatyp kelemiz. Jumys isteıtin jastardyń áleýmettik ósý ıgilikterin utymdy paıdalanyp, qoǵamdyq ómirge belsendiligi esebinen óz qarym-qabiletin shyńdaýy mańyzdy. Bul forým jas býynnyń ózara tanysýyna, tájirıbe almasýyna, spıkerlerdiń eńbek joly qarapaıym kúshtiń qýatyn sezindiredi degen oıdamyn, – dedi M.Ázilhanov.
Jeńil aqshaǵa elirtetin jarnamalar qaptap turǵan tusta memleket múddesine, eldiń órkendeýine, qoǵamnyń damýyna úles qosatyn adal eńbektiń, jumysshy mamandardyń mereıin asyrý, ony halyqtyń sanasyna sińirý mańyzdy bolyp turǵany ras. Forýmǵa qatysqan Senat depýtaty Maksım Rojın jumysshy mamandyqtardyń jastarǵa tartymdy bolýy úshin áreket etý, oǵan kózqarasty ózgertý qajet degen pikirdi aıtyp qaldy.
– О́ndiris oshaqtaryna barǵanymyzda kóp jaǵdaıda bizge «kadr jetispeıdi, jastardy ózimiz úıretip, ózimiz jumysqa tartamyz» dep jatady. Demek el ekonomıkasy úshin mańyzdy salalarda jumys istegisi keletin azamattardy aldyn ala daıyndaýǵa áli de kúsh salýymyz qajet. Baıqaıtynymyz, aýyldyq jerlerde muǵalim, dárigerlerge ǵana jumys bar. Biraq basqa qajet mamandyq ıelerin aýyldan tabý qıyn, – dedi M.Rojın.
Jıyn barysynda Oqý-aǵartý mınıstrligi tehnıkalyq jáne kásiptik bilim departamentiniń dırektory Áset Muhanbetov bıyl birinshi qyrkúıekten bastap bir mamandy kolledjde daıyndaý úshin bólinetin bıýdjettiń quny eki ese artatynyn jetkizdi. Sondaı-aq ol barlyq memleket menshigindegi kolledj kezeń-kezeńimen jańa tehnologııalyq, materıaldyq bazamen jabdyqtalatynyn aıtty.
– Jumysshy kadrlar kóbinese kólik, saýda, ónerkásip jáne aýyl sharýashylyǵy salalarynda suranysqa ıe. Kadrlardy daıarlaý sapasyn qamtamasyz etý úshin jumysshy kásipteri boıynsha 1,6 myń kásiptik standart jańartyldy. Olardyń negizinde bilim berý baǵdarlamalarynyń 87%-y qaıta túzildi, – dedi Á.Muhanbetov.
Búginde ekonomıkalyq belsendi jastardyń úlesi jumys kúshiniń jalpy sanynyń 39%-yn nemese 3,8 mln adamdy quraıdy. Onyń ishinde 3,5 mln-y – jumyspen qamtylǵan jastar.
– Qazir bilim alýshylarǵa tájirıbe jınaqtaýǵa, belgili bir mekemelermen kelisim aıasynda praktıkadan ótýge jaǵdaı jasalǵan. Máselen, stýdentter Aqtóbe ferroqorytpa zaýytyna baratyn bolsa, jalaqy bonýstary beriledi. Onyń ústine ózińniń qarym-qabiletińdi kórsetseń, jumysqa ornalasýǵa múmkindik bar. Mine, osy sekildi eńbek etemin degen jandarǵa «eki qolǵa bir kúrek» tabylady, – dedi Q.Jubanov atyndaǵy Aqtóbe óńirlik memlekettik ýnıversıtetiniń stýdenti Vladıslav Tolochkov.
Forým aıasynda «Eńbek Eri – urpaqtar sabaqtastyǵy» jáne «Eńbek adamy – tabysty tulǵanyń úlgisi» atty arnaıy eki paneldik sessııa uıymdastyryldy. Jalpy is-sharaǵa Qazaqstan halqy Assambleıasy, Prezıdenttik ortalyq pen «Assambleıa jastary» RQB uıytqy boldy.
