«Bul kórme eki kúnge jalǵasady. 2022-2024 jyldary Ǵylym jáne joǵary bilim mınıstrligi Prezıdent tapsyrmasyn oryndaý maqsatynda 23 sheteldik ýnıversıtetpen strategııalyq seriktestik ornatty. Sonyń negizinde Qazaqstanda sheteldik JOO-lardyń fılıaldary ashylyp, qos dıplomdyq baǵdarlamalar iske asyp jatyr. Bıyl taǵy álemdik 11 ýnıversıtetpen strategııalyq áriptestik ornatamyz. Kórmeniń maqsaty – shymkenttik jastarǵa shetelge shyqpaı dúnıe júzilik ýnıversıtet fılıaldarynyń maman daıarlaý múmkindikterimen tanystyrý. Sheteldik fılıaldardyń birazy elimizde stýdentter qabyldaýdy bastap ketti. Máselen bıyl úshinshi jyl qatarynan Petropavlda Arızona ýnıversıteti balalardy oqytyp keledi. Soltústik óńirde fılıal aýyl sharýashylyǵy salasynyń, IT mamandyǵynyń ıelerin daıyndaıdy. Bir aıta keterligi fılıaldar tek Almaty men Astana qalasynan ashylyp jatqan. О́ńirlerdiń áleýmettik-ekonomıkalyq jaǵdaıyn eskere kele sol jaqtarda da fılıaldardy shoǵyrlandyrýǵa den qoıylyp otyr. Sonyń arqasynda keleshekte óńirlerde ǵylym men bilim damıdy degen úmittemiz. Aıtalyq Aqtóbe qalasyndaǵy Jubanov ýnıversıteti janynan qurylǵan Herrıot-Ýott JOO fılıaly eki jyldan beri stýdent oqytyp jatyr. Bul fılıalda bolashaq munaı-gaz salasynyń mamandary daıyndalady. Sebebi Aqtóbe oblysynyń ekonomıkasy munaı-gaz óndirisine negizdelgendikten soǵan saı mamandar da qajet. Búgingi tańda Prezıdent tapsyrmasyna oraı elimizde jasandy ıntelleketini damytýǵa basa kóńil bóline bastady. Osyǵan oraı mınıstrlik álemde JI boıynsha kóshbasshysy sanalatyn Ońtústik Koreıa eliniń Seýl teh baǵdarlamasyn Qyzylordadaǵy Qorqytata ýnıversıtetinde iske asyrýǵa kiristi. Iаǵnı Syr elinen de oqytý baǵdarlamasy ozyq sheteldik JOO fılıaly ashyldy. Shymkent tórinde ótip jatqan bul is-shara kóshpeli kerýen dep atalady. Iаǵnı buǵan deıin Qaraǵandy, Astana, Almaty, Taraz qalalarynda uıymdastyryldy. Endi Shymshahardan soń Túrkistan men Qyzylorda qalalarynda ótkiziletin bolady. Sosyn kórmeniń birinshi kezeńi aıaqtalady. Ekinshi kezeńde elimizdiń batys óńirleri qamtylsa, úshinshi kezeńde soltústik pen shyǵys aımaqtarda uıymdastyrý josparda tur. Taǵy bir aıta ketetin tusy osy fılıaldarǵa oqýǵa túsken talapkerler memlekettik grant esebinen oqýǵa múmkindik ala alady. Sonymen birge stýdentter fılıal talaptary men erejelerine sáıkes belgili bir kezeńde sheteldegi ýnıversıtettiń negizgi bazasynda oqýǵa múmkindigi bar. Máselen Ál-Farabı atyndaǵy qazaq ulttyq ýnıversıtetinde stýdentter eki jyl Qytaıda oqyp kele alsa, AQSh-taǵy Arızona joǵary oqý ornynda bir jyldaı oqý múmkindigine ıe bolady. Iаǵnı utqyrlyq baǵdarlamasy aıasynda shetelde bilim alyp kelý ár fılıaldyń óziniń jeke sharttaryna baılanysty. Búgingi tańda kórme maqsaty tek oqýshylardy joǵary bilim múmkindikterimen tanystyrýdy, qajetti aqparat berýdi kózdeıdi. Al talapkerlerdi qabyldaýǵa daıyndyq fılıaldarda naýryz aıynan bastalady. Degenmen kópshilik JOO ókildikteri jazda tapsyrylatyn UBT nátıjesin kútedi. Qysqasha aıtqanda jetekshi JOO-lardyń elimizde fılıal ashýy bul jastarǵa alysqa barmaı-aq óz elimizde halyqaralyq talapqa saı zamanaýı bilim alýdyń, bir mamandyq ıesi atanyp shyǵýdyń keremet múmkindigi», dedi Ǵylym jáne joǵary bilim mınıstiriniń keńesshisi R.Emelbaev.
Mınıstrlik ókiliniń aıtýynsha, fılıaldarda oqý kóbinese aǵylshyn tilinde ótetindikten talapkerlerden osy tildi jetik bilý talap etiledi. Bul oraıda oqýshylardyń kópshiligi aǵylshyn tilinen IELTS, TOEFL synaqtaryn tapsyrýdan júreksinetindikten kórmede osy emtıhandy ótkizýge ruqsaty bar kompanııa arnaıy shaqyryldy. Onyń mamandary kelgen oqýshylarǵa joǵary atalǵan tildik synaqtyń erekshelikteri men qyr-syryn baıandap berdi. Sonymen birge bolashaq talapkerlerge qaı mamandyq tańdaýǵa keńes beretin arnaıy uıym ókilderi de synaq tapsyrtý arqyly oqýshylardyń belgili bir kásipke ıkemdilikterin anyqtaýǵa kómektesti. Mınıstr keńesshisiniń málimdeýinshe 2025 jyly Shymkentte bir sheteldik JOO fılıalyn ashý kózdelip otyr. Ol Túrkııadaǵy pedagogıkalyq baǵytta maman daıarlaıtyn reıtıngisi joǵary Ǵazı ýnıversıtetiniń fılıaly. Ol О́zbekáli Jánibekov atyndaǵy OQPÝ janynan qurylatyn bolady. Qazirgi tańda osy jumysty aıaǵyna deıin jetkizý úshin tıisti kelisimder júrgizilip jatyr. Mamannyń sózinshe Prezıdent tapsyrmasyna oraı sheteldik JOO fılıaldaryn kóbeıtý arqyly Qazaqstandy Ortalyq Azııadaǵy akademııalyq habqa, ıaǵnı bilim men ǵylym ordasyna aınaldyrý maqsaty tur. Sondaı-aq bir máseleni túsinip alý kerek dedi mınıstr keńesshisi. Ol álemdik reıtıngte joǵary turǵan ýnıversıtet fılıaldary Qazaqstanda jeke-dara JOO bolyp qurylmaıdy, tek elimizde bar jetekshi joǵary oqý oryndarynyń janynan ashylady. Sondyqtan bul fılıaldar respýblıkadaǵy barlyq otandyq JOO-lardyń sapasyn arttyrýǵa, bilim kókjıegin keńeıtýge, Qazaqstan ýnıversıtetterin ózara básekelestirý arqyly oqytý servısin jaqsartýǵa oń septigin tıgizedi. Búgingi zaman jahandaný úderisi júrip jatqan kez. Sol sebepti sheteldik oqý oryndarynyń ıdeologııalyq basqa da yqpalynan qorqýdyń qajeti joq degen de pikir aıtty maman. О́ıtkeni fılıaldyń barlyq bilim baǵdarlamasy mınıstrliktiń tikeleı baqylaýynda bolady eken. Aldyńǵy qatarly sheteldik JOO-lar fılıalyn elde ashý jalpy dúnıe júzinde bar tájirıbe, qalyptasqan úrdis sanalady. Sol úshin Qazaqstan da osy baǵytty tańdap otyr. Tipti kórshiles О́zbekstanda bul bastama baıaǵydan qarqyn alǵan kórinedi.
