Festıval aıasynda mektep oqýshylary men olardyń ata-analaryna erekshe kóńil bólindi. 30 myńnan astam oqýshy kásibı dıagnostıkadan ótip, ózderiniń qyzyǵýshylyqtary men qabiletterin anyqtady.
Oqý-aǵartý mınıstri Ǵanı Beısembaevtyń aıtýynsha, atalǵan festıval barysynda kolledjder men kásiporyndar 250-ge jýyq yntymaqtastyq týraly memorandýmǵa qol qoıǵan. Bul – rasymen úlken kórsetkish.
«Jumys berýshilerdiń bul úderiske belsendi qatysýy qýantady. Bizdiń basty basymdyǵymyz – eńbek naryǵynda suranysqa ıe bilikti mamandardy daıarlaý. Bul úshin biz ınvestorlarmen ózara yntymaqtastyqty arttyramyz. Osy baǵytta 270-ten astam memlekettik kolledjdiń materıaldyq-tehnıkalyq bazasyn jańartý, sondaı-aq kolledjderge sheftik qamqorlyq kórsetetin kásiporyndar sanyn 4 myńǵa deıin arttyrý josparlanyp otyr», dedi Ǵanı Beısembaev.
Mınıstr sóz sońynda festıvaldy uıymdastyrýǵa jáne jumysshy mamandyqtarynyń bedelin arttyrýǵa úles qosqan barlyq mınıstrlikke, ákimdikke, ulttyq kompanııalarǵa, kásiporyndarǵa, kolledjderge, buqaralyq aqparat quraldary ókilderine alǵys bildirdi.
Festıvaldyń bes kúninde 30-dan astam kásiptik baǵdar berý sheberlik synyptary, mamandyq tańdaýǵa qatysty 200-ge jýyq qyzyqty oıyndar uıymdastyrylyp, 1000-nan astam júldeler men syılyqtar oınatyldy. «Beıbit atom» sheberlik sabaǵy aıasynda balalar atom energııasy qoldanylatyn salalar týraly bildi, al «Bortserik mansaby» atty sheberlik sabaqta «Air Astana» áýe kompanııasynyń qyzmetkerleri mamandyqtyń artyqshylyqtaryn, bortserikter men ushqyshtarǵa qoıylatyn talaptar týraly aıtyp berdi. Metallýrgter kóshesinde stýdentter men oqýshylar geolog, geofızık, kenshi, operator rólinde ózin synap kórdi. «ERG», «Kazakhmys», «Qarmet» syndy iri jumys berýshiler kórmelerin trenajer, maket, sımýlıator, VR-tehnologııalarmen jabdyqtap, qatysýshylarǵa mamandyqtardyń qyr-syryna tereń úńilýge múmkindik berdi.
Osy kúni elimizdiń 772 kolledjinde 556 myń stýdent bilim alyp jatyr. Memleket basshysynyń qoldaýymen 2023 jyldan bastap kolledj stýdentteriniń shákirtaqysy eki ese ósti. Bıyl suranysqa ıe mamandyqtar boıynsha tegin tehnıkalyq jáne kásiptik bilim alatyn stýdentter sany 153 myńǵa jetedi, bul ótken jylmen salystyrǵanda 10 myńǵa artyq. Memlekettik tapsyrystyń 70%-y tehnıkalyq mamandyqtarǵa bólinedi. Olardyń qatarynda mashına jasaý, kólik, energetıka, IT, qurylys salalary bar.
