Úkimettiń keńeıtilgen otyrysynda Memleket basshysy Qasym-Jomart Toqaev saılanǵan ákimder men túrli deńgeıdegi basshylardy keshendi daıyndyqtan ótkizý máselesin Úkimet pen agenttikke tapsyrdy.
– Ákimderdi tikeleı saılaý júıesi eldegi mańyzdy reformalardyń biri boldy. Nátıjesinde, memlekettik qyzmetshilerdiń jańa sanaty – saılanatyn basshylar paıda boldy. Bul – 2,5 myńnan asa basshy laýazymyndaǵy qyzmetker degen sóz. Olardyń arasynda buryn memlekettik qyzmette jumys istemegen azamattar, sonyń ishinde jastar kóp. Bir sózben aıtqanda, ákimder korpýsy jańartyldy. 2023 jyly aýdandar men oblystyq mańyzy bar qalalardyń ákimderin pılottyq saılaýy ótti. Barlyq oblysta 45 ákim saılandy. Osy jyldan bastap respýblıkadaǵy aýdan ákimderi tikeleı saılaý arqyly ǵana qyzmetke keledi. Osyǵan oraı búginde aýyl ákimderin qaıta daıarlaý baǵdarlamasynyń iske qosylýy oryndy jáne der kezinde qabyldanǵan sheshim dep sanaımyn. Baǵdarlama ákimderdi aýyl ekonomıkasynyń damýyna áser etetin negizgi faktorlardy aıqyndaýdy úıretedi. Sondaı-aq ákimder aýyldyq eldi mekenderdi damytý joldaryn belgileýdi, basym baǵyttary boıynsha kooperasııalyq jobalar men ekonomıkalyq damý baǵdarlamalaryn ázirleýdi meńgeredi. Sonymen qatar ákimder jergilikti ózin-ózi basqarý úderisterine azamattardy tartý ádisterin úırenedi. Oǵan jergilikti qaýymdastyqpen ózara is-qımyl jasaý jáne birlesken jumys uıymdastyrý tásilderi kiredi, – dedi Q.Bozymbaev.
Ákimderdiń kásibı biliktiligin arttyrý jergilikti bıýdjetti tıimdi paıdalaný, memlekettik satyp alýlar men salyqtar, kommýnaldyq menshikti basqarý, ekologııa men qorshaǵan ortany qorǵaý, kásipkerlikti damytý jáne memlekettik qoldaý, aımaqqa ınvestısııa tartý, memlekettik basqarýdaǵy sıfrlyq tehnologııalar, jasandy ıntellekt quraldaryn qoldaný, qabyldanǵan sheshimderdiń sáttiligine áser etýi múmkin táýekelderdi basqarý, tıimdi kommýnıkasııalar jáne ózge daǵdylardy damytýdy kózdeıdi.
Is-sharaǵa Prezıdent Ákimshiliginiń laýazymdy adamdary, «Amanat» partııasynyń jáne elimizdiń ózge de saıası partııalarynyń ókilderi, Prezıdent janyndaǵy Memlekettik basqarý akademııasynyń oqytýshylary, sondaı-aq óńirlerden aýdan jáne aýyl ákimderi onlaın qatysty. Jıyn barysynda agenttik tóraǵasy Memleket basshysynyń tapsyrmasyn sapaly oryndaý maqsatynda ákimderdi oqytýdyń tıimdiligine erekshe mán berý qajettigine toqtaldy.
– Caıası partııalar Aýyl ákimderin saılaý kezinde ózderi usynatyn kandıdattardyń tulǵalyq jaýapkershiligi men kásibı daıarlyǵyna nazar aýdarǵany jón. «Adal azamat» ıdealdaryna saı, shynaıy maqsatta el ıgiligine ádil qyzmet etýdi kózdeıtin adamdardyń jumysynan qashanda oń nátıje kútýge bolady, – dedi D.Jazyqbaı.
Baǵdarlama praktıkalyq jattyǵýlar, ınteraktıvti pikirtalastar, trenıngter, ekonomıka, memlekettik basqarý, quqyqtaný salalary boıynsha sarapshylarmen kezdesý jáne offlaın, onlaın formatta 240 akademııalyq saǵat oqytýdy qamtıdy. Oqytýdyń qorytyndysyna sáıkes ákimder óńirlerdi ekonomıkalyq damytýǵa qatysty jobalaryn qorǵaıdy.
– «Amanat» partııasy atalǵan jobany Úkimetpen, Memlekettik qyzmet isteri agenttigimen birge, qoıan-qoltyq júzege asyrady. Joba tek oqý baǵdarlamasynan turmaıdy. Iаǵnı baǵdarlama keleshekte tájirıbe almasý men úzdik ádis-tásilderdi engizý alańyna aınalady, – dedi «Amanat» partııasynyń Atqarýshy hatshysy Dáýlet Káribek.
Biliktilikti arttyrý Prezıdent janyndaǵy Memlekettik basqarý akademııasynyń bazasynda, respýblıkalyq mańyzy bar qalalar men oblystardaǵy fılıaldary arqyly júzege asyrylady.
