“NUR SUŃQAR” QORYTYNDYSY ShYǴARYLDY

24 mamyrda “Nur Otan” HDP partııa qyzmetin baspasózde úzdik nasıhattaǵan jýrnalıster arasynda ótkizilgen “Nur Suńqar” respýblıkalyq saıysynyń qorytyndysyn jarııalady. Saltanatty marapattaý rásimi Astana qalasyndaǵy Kongress-Holl saraıynda ótti. “Nur Otan” HDP Tóraǵasy­nyń birinshi orynbasary Nurlan Nyǵmatýlın: “Sizderge birden aıta keteıin, Saıası keńes bıýro­sy­nyń sheshimimen, bul saıys jyl saıynǵy dástúrli sharaǵa aına­lady. Sizderdiń eńbekterińiz bizdiń memleketimiz úshin, halqymyz úshin, táýelsiz Qazaqstanymyz úshin óte mańyzdy da jaýap­ty. Sizderdiń elimizdiń saıası tu­raq­tylyǵy, birligi, áleýmettik-eko­nomıkalyq, rýhanı damýy jo­lynda qosyp jatqan úlesterińiz óte zor. Sol úshin Elbasymyz, partııamyzdyń Tóraǵasy Nur­sul­tan Ábishuly Nazarbaev elimizdegi buqaralyq aqparat quraldaryna erekshe nazar aýdaryp, barlyq jaǵynan qoldaý kórsetip keledi. Osy ýaqytqa deıin sizder, buqa­ra­lyq aqparat quraldary ókilderi, Prezıdentimizben birge bol­dy­ńyzdar jáne bolashaqta da solaı bolyp qala beretinderińizge kúmán joq”, deı kelip, “Nur Suńqar” saıysynyń bizdiń elimizde jýr­nalıstıkany odan ári damytýdy yntalandyra túsetinine senim bildirdi. “Nur Suńqar” saıysy jýrna­lıs­ter arasynda “Nur Otan” par­tııasynyń qyzmetin nasıhattaý, turǵyndardy partııa qyzmetimen keń kólemde aqparattandyrý, jýrnalısterdiń shyǵarmashylyq qabiletin shyńdaý jáne ynta­landyrý maqsatynda birneshe atalymdar boıynsha ótkizildi. “Nash depýtat” – “Bizdiń depýtat” atalymy boıynsha úzdik dep tanylǵan qos jýrnalıstiń qatarynda “Egemen Qazaqstan” AQ tilshisi Anar Tóleýhanqyzy marapattaldy. Al saıystyń bas júldesin “Habar” agenttiginiń jýr­nalısi Aleksandr Aksıýtıs qanjyǵasyna baılap, oǵan páter kilti tabys etildi. “Egemen-aqparat”.