Án men bı – adam men álemniń úndestigi. Janyńa sezim syılaı alatyn, júrekpen sóıleıtin óner. Sahnaǵa shyqqan bıshiniń ár ulttyń tól áýenine yrǵalyp, qımyldaǵan qozǵalysy sol eldiń murasyn jańǵyrtqandaı áser qaldyrady. Al áni ishki jan dúnıesiniń tereńdigin, bolmysyn asha túsedi. Osy qýatty quraldy «Birlik» ansambli ıgi maqsatta qoldanyp keledi. Ár etnostan quralǵan ónerpazdar ortaq sahnada óner kórsetip, ózara mádenı almasýdy kúsheıtip, elde birtutas ult qaǵıdatyn nyǵaıtýǵa septesip júr.
Alǵash ujymdy jasaqtaýda elimizdiń ár buryshynda kastıng ótkizilip, túrli etnos ókilderi men mýltıınstrýmentalıster arasynan 20 úzdik bıshi men mýzykant tańdalǵan. Olardyń qabilet-qarymyn, tehnıkalaryn shyńdaýda, kompozısııalardy daıyndaýda osyndaı ujymdarda óner kórsetip júrgen, tájirıbesi bar, alys shetelden metrler men myqty mamandar shaqyrylǵan. Olardyń qatarynda Reseı, Tatarstan, О́zbekstannyń eńbek sińirgen qaıratkerleri bar.
«Bastapqyda ansambldiń quramynda 20 bıshi bolsa, qazir 24-ke kóbeıdi. Qazaqstannyń eńbek sińirgen qaıratkeri Qarlyǵash Ájıeva osy ansambldiń alǵashqy konsertiniń qoıýshy-rejısseri boldy. Ol óner ujymyna kóptegen talantty taýyp, sahnaǵa shyǵarýǵa kómektesti. Al bas baletmeıster retinde Janataı Kojabekov shaqyryldy. Bıyl elimizdegi mańyzdy oqıǵalardyń biri Qazaqstan halqy Assambleıasynyń 30 jyldyq merekesi toılanǵaly otyr. Osyǵan oraı 30 qańtarda Almaty qalasynyń turǵyndary men qonaqtaryna arnap jeke konsertimizdi ótkizdik. Is-sharada óner ujymy qazaq, orys, ázerbaıjan, tájik, uıǵyr, cheshen, koreı jáne tatar halyqtarynyń bılerin oryndady. Bir aıta keterligi, kórermender dál osy konsertte «Jiger» neoqazaq bıiniń premerasyn tamashalady», dedi «Birlik» ansambliniń kórkemdik jetekshisi ári bıshisi Anel Marabaeva.
Ansambldiń biregeı repertýary eldegi 100-den asa etnostyń mýzykalyq murasy men ónerin qamtıdy. Qazaqtyń «Kúı shashý», orystyń «Rýsskıı tanes», ózbektiń «Dýchava», qyrǵyzdyń «Ergeme», tatardyń «Aq Idel», tájiktiń «Chılvaı Hıromon», t.b. bıleri bar. Muny byltyr tusaýkeser saltanatynda Mádenıet jáne aqparat mınıstri Aıda Balaeva erekshe atap ótken edi.
«О́z isine, ónerine jan-tánimen berilgen daryndy ártisterdiń arqasynda bizdiń baı mádenıetimiz ben tarıhymyz urpaqtan-urpaqqa jalǵasady. Bul halyqaralyq arenalarda aıqyn kóriniske ıe. Ansambldiń tusaýkeseri Alǵys aıtý kúnine oraılastyrylǵan. Osylaısha, ártúrli etnosty biriktiretin, birlik pen úılesimniń nyshanyna jáne Qazaqstannyń tól brendine aınalatynyna senimdimin», dedi A.Balaeva.
Ansambl az ǵana ýaqyt ishinde biraz bıikti baǵyndyryp úlgerdi. О́rkenıet kóshine ilesken álemniń birqatar elinde, atap aıtqanda Túrkııa, Reseı, Túrikmenstannyń ónersúıer qaýymyn tamsandyrdy. Bıyl tipti Eýropaǵa aıaq basyp, konsert berýdi de josparlap otyr.
«Birlik» – jastardyń ortaq ıdeıa aınalasynda jumylyp, qoǵamnyń ıgiligi úshin birlese alýynyń aıqyn dáleli. Ujymnyń bólshegi bolý shyǵarmashylyqty arttyryp qana qoımaıdy, ujym múshelerinde yntymaqtastyq pen túrli mádenıetke degen qurmetti qalyptastyrady. Osylaısha, qazaq ónerin jańa deńgeıge kóterip, halyqaralyq arenada Otanymyzdyń baı ulttyq ónerin tanystyryp, elimizdiń mádenı ártúrliligin kórsetetin birlik pen kelisim ıdeıasyn nasıhattaıdy. Sondaı-aq óner ujymy álemniń jetekshi horeograftary jáne mýzykanttarymen mádenı yntymaqtastyqty belsendi qoldap keledi. Endi halyqaralyq festıvaldar men konkýrstarǵa qatysýdy kózdep otyrmyz», dedi A.Marabaeva.
Demek óner – shyǵarmashylyqtyń ǵana kórinisi emes, birliktiń de sımvoly. Bul adamdar arasyndaǵy aıyrmashylyqtardy umytyp, ortaq ıdeıa men maqsatqa baǵyndyra alady. Munyń kúshi – ortaq tilde sóıleı bilý, júrekten júrekke jetý, álemdi izgilikke jeteleý jolynda bir bolý.
