ASTANA. 7 aqpan. Almatyda jasy 81-ge qaraǵan shaǵynda Qazaqstannyń belgili jazýshysy Gerold Belger júrek naýqasynan qaıtys boldy. Bul týraly Tengrinews.kz tilshisine prezıdenttiń is basqarmasyna qarasty ortalyq klınıkalyq aýrýhanadan habarlady.
«7 aqpan kúni saǵat 14:15-te Belger qaıtys boldy», - dep habarlady aýrýhanadan.
Budan buryn habarlanǵandaı, Gerold Belgerdiń ınfarktten keıin 21 qańtarda jansaqtaý bólimine túskeni habarlanǵan bolatyn. Ol reanımasııada ókpege aýa beretin jasandy apparatpen jatty. Medıkterdiń aıtýlarynsha, Belger densaýlyq jaǵdaıy nasharlyǵyna qaramastan, óte kóp jumys jasaǵan. Dárigerler oǵan júrekte qosymsha jasandy qan aǵatyn jol jasaýǵa arnalǵan operasııa jasaý kerektigi týraly birneshe ret usynys aıtqan. Biraq Belger odan ylǵı bas tartypty. Emdeýshilerdiń aıtýlaryna qaraǵanda, jazýshy birinshi ınfarktti 1978 jyly alǵan. Sodan keıin bul jaǵdaı 5 ret qaıtalanǵan. Budan basqa, qalamger 1999 jyly ınsýltti de bastan keshken. Ol sondaı-aq sýsamyrmen de aýyryp júrgen.
Gerold Belger 1934 jylǵy 28 qazanda Saratov oblysyndaǵy Engels qalasynda týǵan. 1941 jyly ol otbasymen birge nemis ultynyń ókili retinde Qazaqstanǵa jer aýdarylǵan. Ol osydan bastap Soltústik Qazaqstan oblysyndaǵy qazaq aýylynda ósti. Osynda ol qazaq tilin jetik meńgerip shyqty.
Belger Abaı atyndaǵy Qazaq memlekettik pedagogıkalyq ınstıtýtynyń ádebıet fakýltetin bitirip, eńbek jolyn Jambyl oblysynda orta mektepte orys tili men ádebıetinen sabaq berýden bastady.
Belger 1971 jyldan beri Qazaqstan Jazýshylar odaǵynyń múshesi boldy. 1992 jyldan nemis tilindegi «Fenıks» almanaǵynyń bas redaktory. 1994-1995 jyldary QR Joǵarǵy Keńesiniń depýtaty. Ol nemis mádenı qoǵamy Almaty qalasyndaǵy bólimshesiniń tóraǵasy, Qazaqstan nemisteri keńesiniń múshesi jáne QR Prezıdenti janyndaǵy memlekettik saıasat jónindegi ulttyq keńestiń múshesi boldy.
Gerold Belger 53 kitaptyń avtory. Olardyń arasynda «Sosnovyı dom na kraıý aýla», «Chaıkı nad stepıý», «Za shestıý perevalamı», «Brat sredı bratev», «Kamennyı brod», «Zavtra býdet solnse» jáne basqalary tanymal boldy. Ol qazaq ádebıetiniń Beıimbet Maılın, Ǵabıt Músirepov, Ábdijámil Nurpeıisov sekildi klassıkteriniń shyǵarmalaryn orys tiline aýdardy.
Murat Aıtqoja.
Derek, sýret: Tengrinews.kz.
