Foto: Ashyq derekkóz
Depýtattyń pikirinshe, mundaı qyzmetterge degen joǵary suranys «jattyqtyrýshylar», «bıznes-trenerler» jáne kóbinese qajetti biliktilikteri joq basqa da mamandardyń kóptep paıda bolýyna ákeldi.
«Pikirimen kópshilik sanasatyn «mamandar» sany kún sanap ósip keledi, olardyń keıbireýleri qajetti bilimi men tájirıbesi joq, kýrstar men trenıngterdi satýǵa kirisip, lezde nátıje beretinine ýáde beredi. Bul adamdar sarapshy mártebesin ıelenýge umtylady, biraq olardyń qyzmetinde kóbinese naqty saraptamalyq negiz joq. Mundaı áreketter azamattardy adastyryp, qyzmet kórsetý sapasyna negizdi kúmán týdyrady jáne osy salaǵa degen senimge nuqsan keltiredi. Máseleniń aýqymdylyǵyn azamattardyń ótinishteriniń sany rastaıdy: tek 2024 jyldyń ózinde Tutynýshylardyń quqyqtaryn qorǵaý komıtetine sapasyz bilim berý qyzmetterine qatysty 600-den astam shaǵym túsken. Bul osy salaǵa degen senimsizdiktiń joǵary dárejesin ǵana emes, ony retteýdiń naqty qajettiligin de kórsetedi», dedi Dınara Naýmova.
Onyń aıtýynsha, bul salada óz klıentterine nátıjege jetýge shynaıy kómektesetin bilikti mamandar jumys isteıdi. Degenmen, «ıllıýzııa jattyqtyrýshylary» dep atalatyn ádiletsiz áreketterdiń kóbeıýi búkil salany qabyldaýǵa teris áser etedi.
«Isine adal emes praktıkterdiń sendire aıtatyn ýádeleriniń qurbanyna aınalǵan azamattar bizge jıi júginedi. Aýqymdy tabysqa tez jetý úshin keıbir azamattar óz problemalarynan shyǵýdyń jolyn izdep, «tez baıý», «jańa ómir» nemese «bir aıdan keıin armandaǵan mansap» ýádelerine senim artady, qomaqty qarajat salady, keıde tipti osy qyzmetterdi tóleý úshin nesıe alady. Úmitteri aqtalmaǵan jaǵdaıda adamdar ýáde etilgen nátıjege qol jetkizý múmkin emes ekenin jáne olardyń quqyqtaryn qorǵaý mehanızmderi is júzinde joq bolǵandyqtan, aqshalaryn qaıtara almaıtynyn túsinedi», dedi depýtat.
Dınara Naýmova bul saladaǵy retteýdiń joqtyǵynan másele ýshyǵyp turǵanyn atap ótti. Naqty standarttar men biliktilik talaptarynyń bolmaýy kez kelgen adamǵa ózin jattyqtyrýshy dep ataýǵa múmkindik beredi, bul alaıaqtyqqa jaǵdaı jasaıdy. Nátıjesinde tutynýshylar da, sapaly mamandar da zardap shegedi, óıtkeni olar jalpy salaǵa degen senimdi joǵaltady.
Aıta keteıik, álemdik tájirıbe kórsetkendeı, birqatar elderde mamandardy sertıfıkattaý jáne akkredıtteý prosesi qatań retteledi. Mundaı sharalar tutynýshylardyń quqyqtaryn qorǵap qana qoımaı, kórsetiletin qyzmetterdiń sapasyn aıtarlyqtaı jaqsartýǵa yqpal etedi. Sertıfıkattaý mamannyń biliktiligi men kásibı quzyrettiligin rastaý qyzmetin atqarady, bul azamattardyń senimin arttyrady jáne sapasyz qyzmetterdi alý táýekelderin azaıtady.
Depýtat joǵaryda aıtylǵandarǵa baılanysty kelesi sharalardy qabyldaý múmkindigin qarastyrýdy usyndy.
«Jattyqtyrýshylardy, koýchterdi jáne ózgelerge bilim berýmen aınalysatyn ártúrli mamandardy mindetti sertıfıkattaý jáne akkredıtteý júıesin damytý. Mundaı júıe kásibı standarttarǵa sáıkestikti qamtamasyz etedi jáne azamattardyń osy qyzmetterge senimin arttyrady. Barlyq azamattarǵa qoljetimdi bolatyn sertıfıkattalǵan mamandardyń biryńǵaı tizilimin qurý. Bul ashyqtyqty jáne oqýdy bastamas buryn mamannyń biliktiligin tekserý múmkindigin qamtamasyz etedi. Tutynýshylardyń quqyqtaryn qorǵaý jáne tıisti qyzmetterdi kórsetý salasynda jumys isteıtin sýbektilerdiń kásibı jaýapkershiligin arttyrý maqsatynda retteýdi jetildirýge baǵyttalǵan zańnamalyq bastamalardy qabyldaý. Bul sharalar azamattarymyzdy alaıaqtyqtan qorǵaýǵa kómektesip qana qoımaıdy, sonymen qatar qyzmet kórsetý sapasy joǵary standarttarǵa saı keletin kásibı qoǵamdastyqtyń qalyptasýyna jaǵdaı jasaıdy», dedi D.Naýmova.
