Foto: zhalagash-zharshysy.kz
«О́te úlken somalar ataldy. Másele, AFM quqyq qorǵaý organy bolyp tabylatyn ekonomıkalyq tergeý qyzmetiniń quramyna kiredi. Jáne biz qylmystyq isti ýákiletti organ tıisti tekserý júrgizip, aktini nemese qorytyndyny usynǵannan keıin ǵana tirkeı alamyz, onda memleketke salyqty tólemeý túrindegi zalaldyń naqty somasy anyqtalady», dep málimdedi Jeńis Elemesov.
AFM tóraǵasynyń orynbasarynyń aıtýynsha, vedomstvo salyq organdary tekserýdi aıaqtamaıynsha jáne zalaldyń naqty mólsherin anyqtamaıynsha, qylmystyq isterdi óz betinshe qozǵaı almaıdy.
«Eger naqty blogerge qatysty memleketke keltirilgen zalal somasy búgingi qylmystyq zańnamada kózdelgen normalardan asyp ketse, onda qylmystyq is tirkeletin bolady. Eger bul shekten asyp ketpese, onda olardy Memlekettik kirister komıteti ákimshilik jaýapkershilikke tartady», dep qosty Jeńis Elemesov.
Esterińizge sala keteıik, Qazaqstan blogerleri mıllıardtaǵan teńgege bereshek týraly jappaı salyq habarlamalaryn alǵan bolatyn. MKK málimetinshe, 594 adam óz tabysyn 53,3 mlrd teńgege tómendetip kórsetken.
