Eńbek jaǵdaıy jaqsaryp, eńbekker quqy eskerilse...

Qala ákiminiń orynbasary Sársen Quranbek jergi­lik­ti atqarýshy bılik tarapy­­nan jumysshy mamandyqtaryn qol­daý­ǵa baǵyttalǵan is-sharalar týraly keńinen áńgimelep berdi. «Jumysshy mamandyqtary jylyna» baılanysty keshendi jumystar atqarylady. Úki­met bekitken arnaıy josparǵa sáı­kes óńirlik jospar ázirlendi. Sonyń negizinde qaladaǵy 40 arnaýly oqý oryndarymen, óndiris oshaqtarymen tyǵyz baılanys ornatyldy. Búgingi jármeńkede ýaqytsha, turaqty jumys oryndary boıynsha jumys berýshi­ler 2,5 myńǵa jýyq ózderine qajetti mamandyqtardy usynbaq. Is-sharaǵa joǵary synyp oqýshylary men ýnıversıtet stýdentterin arnaıy qatystyryp otyrmyz. Mundaı jármeńke shaharda toqsan saıyn uıymdastyrylatyn bolady», dedi S.Quranbek.

Qala ákimdigi bıyl 40 tehnıka­lyq, arnaýly kolledjderge 11 500 grant bó­lip otyr. Onyń 6 myńy respýblıka­lyq, 5,5 myńy jergilikti bıýdjet esebi­nen qarastyrylǵan. Granttyń 80-85%-y jumysshy mamandyqtarǵa beril­mek. Qala ákimdigi óndiris oryndarymen áriptestik baılanys ornatyp, ondaǵy mamandar kolledjderde stýdentterge tálimgerlik sabaqtar berip, mektepterde oqýshylarmen mamandyq tańdaýǵa qatysty arnaıy kezdesýler ótkizýdi josparlap otyr.

Shymkent qalalyq jumyspen qamtý jáne áleýmettik qorǵaý basqarmasy­nyń basshysy Janat О́tebaevanyń ­aıtýynsha, turaqty jumys taba alma­ǵan azamattar ýaqytsha jumyspen qam­ty­lý arqyly sol mekemeniń tynys-­tir­shiligimen tanysady. Eger qyzmetin­de bel­sendilik tanytyp jatsa, sol jer­de maman bolyp qalýyna múmkindik bar. Ýaqytsha jumyspen qamtý sharasy­nyń merzimi bitken kúnniń ózinde azamat tájirıbe jınap qalady.

Basqarma basshysynyń málimde­ýin­she, búginde qalada 12 myń azamat osy mekemede jumyssyz retinde tirkeý­de tur. О́tken jyly jumyssyzdyq deńgeıi 4,8% boldy. 2024 jyly jas­tar arasyndaǵy jumyssyzdyq deń­geıin 3,7% mejeden asyrmaý min­deti qoıylǵan bolatyn. Alaıda ótken jyly jastardyń jumyssyzdyq deńgeıi sha­harda 3,1% kórsetip, basqarma jyldy jaqsy nátıjemen qorytyndylady. Sıfrlyq múmkindiktiń arqasynda qazir azamattar tek Shymkentte ǵana emes, elimizdiń barlyq óńirinen bos jumys oryndaryn izdep taba alady. Ol úshin arnaıy ázirlengen platforma – «Enbek.kz» portalyna kirse jetkilikti. Qysqasy, adamnyń jumysqa turýy kóp jaǵdaıda tikeleı ózine baılanysty. Kez kelgen azamat bilim alyp, kásibı shyńdalsa ondaılarǵa árdaıym jumys tabylady. Memleket te jan-jaqty qoldaýlar qarastyrǵan. Máselen, óz mamandyǵyna saı jumys tabylmaı jatsa, úsh aılyq kýrs oqyp, qosymsha mamandyq ıgerýine bolady. Konkýrsqa qatysyp, 400 AEK kóleminde qaıtarymsyz grant utyp ala alady. Qarajatty keıin jeke kásibin damytýǵa jumsaıdy. Eshqandaı járdem bolmaı jatsa, jaǵdaıy joq kisilerge ataýly áleýmettik kómek taǵaıyndalady.

«Qazir kóp azamat, ásirese jas­tar ju­mysty tańdap, talǵap isteıdi. Iаǵnı bir orynda turaqtamaı basqa jumys­qa aýysyp kete beredi. Onyń birden-bir sebebi – jalaqynyń tó­mendigi. Degenmen tek aqshany basty maqsat etip qoıýǵa da bolmaıdy. Adam aldy­men tańdaǵan mamandyǵyn ıgerip, sonyń kásibı sheberi bolýǵa umtylǵan jón. «Daraq bir jerden kógeredi» degen má­tel bar. О́z basym osy deńgeı­ge jet­kenge deıin qarapaıym qyzmet­ker bolyp jumys istedim. Jastar aldymen tájirıbe jınaý, biliktiligin arttyrý, naǵyz maıtalman maman bolý jaǵyn kóbirek oılaǵany maqul», dedi J.О́tebaeva.

Jolaýshy tasymaly qyzmetimen aınalysatyn TTK kompanııasynyń ókili Ábdibek Úkibaev jármeńkege óndiristik salada jumys isteıtin agregatshy, avtoslesar, motorıst sekildi mamandar izdep kelgenin aıtady. Kom­panııada avtobýstarǵa servıstik qyz­met kórsetetin mamandardyń aılyǵy óte joǵary. Qytaıdan keletin jolaý­shy tasymaldaıtyn kólikterdiń qoz­ǵaltqyshy kúrdeli ári ishinde elek­tro­nıkalyq quraldar kóp bolǵan­dyq­tan, qyzmetkerlerin sol elge aparyp, arnaıy kýrstarda oqytyp qaıtqan.

Shaharda joǵary aılyq tóleıtin mekemeler barshylyq. Tájirıbesi myq­ty mamandar jumys izdese ondaı bi­likti jandarǵa qashanda bos jumys oryn­dary tabylady. Tehnıkalyq kol­ledj­di bitirip dánekerleýshi bolyp is­tep jatqan keıbir mamandar búginde 500 myń teńgeniń ústinde aılyq alyp otyr. Tájirıbeniń ýaqyt óte kele toly­sa­ty­nyn eskersek, jańadan jumys­qa or­nalasqan mamandarǵa shydamdy­lyq pen yjdaǵattylyq, eńbek pen izde­nis kerek.

Jumystyń turaqty bolýy tek eń­bek­kerge ǵana emes, jumys berýshi­­niń ózine de baılanysty. Eger kásiporyn ­bas­shy­sy eńbek zańnamasyn saqtama­sa, on­daı jerge jumysshy turaqta­maı­tyny anyq. Jeke jumys berýshiler tarapynan qol astyndaǵy jumysker­ler­ge qatysty zań talaptaryn óreskel buzatyn jaǵdaılardyń jıi bolyp turatyny jasyryn emes. Sondyq­tan «Jumysshy mamandyqtary jyly» aıasynda qarapaıym eńbekkerlerdiń quqyǵyn qorǵaý máselesine de erekshe mán berilse ıgi.

ShYMKENT