Foto: Ashyq derekkóz
Depýtattyń pikirinshe, Ýkraına tarapy KQK-nyń Qazaqstan munaıyn tasymaldaýdaǵy strategııalyq mańyzyn jaqsy bilgeni anyq.
«KQK-ǵa jasalǵan shabýyl – bul halyqaralyq konsorsıýmǵa soqqy, onyń quramynda iri amerıkalyq jáne eýropalyq kompanııalar bar. Olar da ýkraın áskeriniń bul áreketinen tikeleı shyǵynǵa ushyrap otyr», dep jazdy Marat Bashımov Facebook-tegi paraqshasynda.
Bul rette májilismen Ýkraına ustanymynyń ekijúzdiligi baıqalatynyn atap ótti.
«Bir jaǵynan olar AQSh pen Eýropadan áskerı jáne basqa da kómek suraıdy, al ekinshi jaǵynan – olardyń ekonomıkalyq múddelerine soqqy jasaıdy. Eń bastysy – Qazaqstanǵa qatysty mundaı agressııanyń sebebi túsiniksiz. Bizdiń elimiz Reseı men Ýkraına arasyndaǵy qaqtyǵys bastalǵannan beri beıtarap pozısııany ustanyp, beıbit sheshýdi jaqtady, dep jazdy M.Bashımov.
Sondaı-aq ol eki el arasyndaǵy dıplomatııalyq baılanystar bir sátke de úzilmegenin tilge tıek etti.
«Sonymen qatar, búkil álem Qazaqstan Prezıdenti Qasym-Jomart Toqaevtyń Sankt-Peterbýrg forýmynda DHR men LHR-dy moıyndamaıtynyn ashyq málimdegenin kórdi. Biz birneshe ret BUU ókilderin shaqyra otyryp, beıbit kelissózder alańy bolýǵa daıyn ekenimizdi bildirdik. Osyǵan baılanysty KQK-na jasalǵan shabýyl Qazaqstan men Ýkraına arasyndaǵy qarym-qatynasqa aıtarlyqtaı zııan keltiredi», dedi májilismen.
Bul rette ol Qazaqstan Ýkraınadan elimizdiń múddelerine qarsy jasalǵan bul áreketi úshin resmı túsinikteme talap etýi kerek ekenin atap ótti. Sondaı-aq halyqaralyq nysanǵa jasalǵan shabýylǵa kinálilerdi jaýapqa tartý úshin barynsha qatań jáne prınsıpti sharalardy qoldaný qajet ekenin de basa aıtty.
