Kollajdy jasaǵan – Qonysbaı ShEJIMBAI, «EQ»
Bektibaı Jylqybaev 1941 jyly 16 maýsymda Reseıdiń Chkalov oblysynyń Dombarovsk aýdanynan maıdanǵa attanǵan. Reseıde dúnıege kelip, sol jaqtan áskerge alynǵandyqtan da bolar, birneshe memlekettik marapat alǵan oǵlan týraly qazaq baspasózi kóp jazbapty.
Biz sóz etip otyrǵan maqalada Bektibaı Jylqybaev maıdanǵa alǵash kelgende kópke deıin kóńili kónshimeı júrgeni, munyń sebebin suraǵandarǵa: «Áli kúnge deıin jaýdyń bir samoletin atyp túsire alǵanym joq. Jurtqa ne aıtpaqpyn?», degen eken.
«Bir kúni jaýdyń tórt samoleti bizdiń áskerlerdiń tóbesine shúıildi. Bektibaı zeńbireginiń aýzyn tóbeden tóngen samoletterge buryp:
– Atyńdar! – dep komanda berdi. Zeńbirek kúnshe kúrkireı qaldy. Jaýdyń alda kele jatqan samoleti kenet órtenip, janǵan boıy tómen quldılady. Jylqybaev oqtyń betin jaýdyń basqa samoletine aýdardy. Sovet zenıtchıginiń syńaıyn tanyǵan nemis samoletteri shuǵyl burylyp keri qaıtty.
Jaý samoletteri ketken soń, Bektibaı atyp túsirilgen «Messershmıdtiń» Neva jaǵasynda janyp jatqanyn kórdi. Kópten beri kóńilinde túıtkil bolyp júrgen armany oryndalǵandaı boldy», deıdi avtor.
Ushaqty joıǵan batyrdyń kóńilindegi túıtkil tarap, senimi kúsheıip, shıryǵa túskenge uqsaıdy. Birte-birte Bektibaı ushaq atyp túsirýdiń sheberine aınalǵan.
«Jaýdyń barlaýshy samoletteri ótkel ústinen ersili-qarsyly ushyp, aınalsoqtap shyqpaı qoıdy. Nemisterdiń taıaý ýaqytta ótkeldi bombalaıtyny málim boldy. Sovet zenıtchıkteri kózderin kókke tigip, muqııat baqylaı bastady. Ertemen bir top «Iýnkers» bizdiń bólimshelerdiń ústine túıildi. Jaý samoletine birinshi bolyp Jylqybaev oq atty. Onyń atqan snarıadtary jaý samoletiniń birine tıdi. О́rtengen «Iýnkers» shyr kóbelek aınalyp, tómen aqty. Mine, taǵy da bir top «Iýnkers» ushyp keledi. Olar ushqan betterimen batareıaǵa shúıildi. Biraq sovet erleriniń jaýdyrǵan oǵyna tótep bere almaı, bytyraı bastady. Shúıilip bomba tastamaq bolǵan bir «Iýnkersti» Jylqybaev taǵy da atyp túsirdi».
M.Kozlov pen M.Osmolovskıı atty aǵa leıtenanttar jazǵan maqalanyń sońynda Bektibaı janyp jatqan snarıadtar jáshigin óshirip, batyrlyǵynyń arqasynda bir zeńbirekti órtten aman alyp qalǵanyn, keıinnen sol zeńbirekpen taǵy da fashısterdiń 8 ushaǵyn atyp túsirgenin baıandaǵan.
Maıdandaǵy aqtańdaqtardyń joqshysy bolyp júrgen «Atamnyń amanaty» qorynyń qyzmetkerleri arqyly aty-soıy qazaqqa beımálim bolyp kelgen Bektibaı Jylqybaev týraly málimetterdi taptyq.
Bektibaı Jylqybaev 1942 jyldyń 1 qazanynda jaý áskeriniń 5 ushaǵyn joıyp, nátıjesinde, 189 ushaqtyń shabýylyn toqtatyp, «Qyzyl juldyz» ordenine usynylypty. Keıipkerimiz ol marapatty aldy ma, almady ma, ol jaǵy belgisiz. Belgilisi, soǵys kezinde bas basylym maqala jarııalaǵan batyr el senimin aqtap, arada bir jyl ótkennen keıin de áýe shaıqastaryn toıtaryp, sheberligi men batyrlyǵynyń arqasynda nemisterdiń birneshe ushaǵyn atyp túsiripti. Demek qazaq Bektibaı Jylqybaev syndy batyry bar ekenin eshqashan da umytpaýǵa tıis.
