Atalǵan joba – partııa men Eńbek jáne halyqty áleýmettik qorǵaý mınıstrliginiń birlesken bastamasy. Oǵan oblystar men qalalardyń jergilikti atqarýshy organdary da atsalysyp júr.
– Jastar zııatkerlik, ınnovasııalyq jáne eńbek áleýetiniń rezervi bola otyryp, eldiń áleýmettik-ekonomıkalyq damýyna jańa serpin bere alady. Búginde ekonomıkalyq belsendi jastardyń úlesi jumys kúshi jalpy sanynyń 39 paıyzyn quraıdy. «Jumysshy mamandyqtary jyly» aıasynda jańa jumys oryndaryn qurý, eńbek naryǵynda talap etiletin daǵdylarǵa baýlý úshin kásiptik standarttar men jańa oqý baǵdarlamalaryn bekitý, jumys berýshiler, mektepter men kolledjder arasyndaǵy ózara is-qımyldy kúsheıtý, tálimgerlik ınstıtýtyn damytý, qaýipsiz jumys ornyn qurý, sondaı-aq jumysshy kásipteriniń ımıdjin arttyrý baǵytyndaǵy is-sharalar kózdelgen. Aldaǵy 6 jylda kadrlarǵa suranys 1,6 mln adamdy quraýy múmkin dep boljanady. Onyń ishinde ásirese, kásiptik-tehnıkalyq bilimi bar jumyskerlerge qajettilik artpaq, – dedi Eńbek jáne halyqty áleýmettik qorǵaý birinshi vıse-mınıstri Aqmádı Sarbasov.
Byltyr 1,5 myńnan asa is-shara ótkizilip, 150 myń jas qamtyldy. Jumys berýshilermen 5 myńnan asa memorandýmǵa qol qoıyldy. Sonyń biri – Petropavl qalasyndaǵy Kırov atyndaǵy kásiporyn. Munda naǵyz kásibı mamandar toptasqan. Olar sheberligin, qarym-qabiletin kórsetip, eń bastysy adaldyǵymen otandyq óndiristiń ilgerileýine septigin tıgizip júr. Osyndaı mamandardyń biri – 5-sanattaǵy temir ustasy Sanat Maqanov. Ol zaýytta 2009 jyldan beri jumys isteıdi. Osy aralyqta bilikti maman «Úzdik temir ustasy» baıqaýynyń jeńimpazy atanyp ta úlgergen. Buǵan qosa kásibı jetistikteri úshin oblys jáne qala ákimdikterinen, Indýstrııa jáne qurylys mınıstrliginen birneshe ret gramota alyp, eńbegi elengen. Al 2020 jyly «Eńbek dańqy» ordenimen marapattaldy. Kúndelikti ómir saltynan sportty da tys qaldyrǵan emes, 2017 jyly «Rıng patshasy» týrnıriniń jeńimpazy atandy. Kásiporyn basshylyǵy da ustanyń eńbegin joǵary baǵalap, árdaıym qoldaý bildirip keledi. Bastapqyda zaýyttyń jataqhanasynda turǵan Sanat kásipodaq arqyly tıimdi ıpotekalyq baǵdarlamamen páter satyp alǵan.
– Jumysshy mamandar mańdaı termen, qara kúshpen elimizdiń ilgerileýine septigin tıgizip otyr. Bylaısha aıtqanda, belgili bir kásiporyn, óndiris ne zaýyt bir ǵana adamnyń, otbasynyń qamy úshin emes, bútin Qazaq eliniń bolashaǵyna da úles qosady. О́zimniń jaýapkershiligi mol salada eńbek etip júrgenime rızamyn. Sondyqtan jastardyń osyndaı ortadan óz ornyn tapqanyn, eńbek jolyn zaýyttan bastaǵanyn qalaımyn, – deıdi S.Maqanov.
Elimizdiń barlyq óńirinde 200-ge jýyq bos oryndar jármeńkesi ótkizilip, oǵan 5,2 myń uıym qatysqan. Nátıjesinde, 55 myńnan asa adam jumysqa shaqyrtý alyp, 562-si eńbekke aralasyp ketti.
Ilkimdi istiń ıgiligin kórgenderdiń biri – túrkistandyq Sulýshash Orazbaı. Saıram aýdanynda turatyn jas aldymen Jumyspen qamtý ortalyǵyna baryp tirkelgen. Keıin mamandar «Bos oryndar jármeńkesi» ótetinin habarlap, sol alańnan jumys izdeýge qolqa salǵan.
– Oraıy kelip, sáti túsip Qasymbek datqa aýylyndaǵy №64 orta mektepke is júrgizýshi bolyp ornalastym. Aýylda kóbine muǵalim men dárigerge jumys tabylady. Eger kásiporyn, óndiris orny, taǵy sol sııaqty zaýyt aýmaǵyndaǵy eldi meken bolsa, tipti jaqsy, ózge de mamandyqtar boıynsha eńbek etýge bolady. Jalpy baǵyt-baǵdar berip, jón silteıtin baǵdarlamalardyń bolǵany qýantady, – deıdi Sulýshash.
