«Astana» jeńilisten kóz asha almaı keledi

ASTANA. 8 aqpan. Basketboldan VTB lıgasynda el namysyn qorǵaıtyn «Astana» syrt alańda Volgogradtyń «Krasnyı Oktıabr» komandasynan 84:72 esebimen jeńildi. Bul týraly egemen.kz habarlady. Osy oıyn aldynda «Astananyń» bas jattyqtyrýshysy aýysty. Klýb basshylyǵynyń mundaı sheshim qabyldaýyna «Astananyń» bıylǵy maýsymdaǵy súreńsiz oıyny sebep boldy. Tipti, VTB lıgasy men Evrochelledj týrnıri aıasyndaǵy sońǵy bes kezdesýde jeńilis taýyp, týrnır kestesindegi jaǵdaıy ábden nasharlap ketti. Nátıjesinde, Aleksandr Trıfýnovıch qyzmetinen ketip, elordalyqtardy Volgogradqa lıtvalyq maman Ramýnas Býtaýtas bastap bardy. Bul mamanmen «Astana» maýsym sońyna deıin kelisim shart jasasty. Býtaýtas kezinde Lıtva quramasyn jattyqtyryp, 2008 jylǵy Pekın Olımpıadasynda komandasymen birge 4-orynnan kóringen. Odan bólek, Lıtvanyń ataqty «Jalgırıs» komandasyn da jattyqtyrǵan tájirıbeli maman. Latvııa, Ýkraına elderinde de jumys istegenin aıta keteıik. Volgogradtaǵy oıyn astanalyqtardyń basymdyǵymen bastaldy. Esepti ashqan da bizdiń komanda. Tipti 6:0 esebimen alǵa shyqty. Úziliske deıin tizgindi ýystarynan shyǵarmaǵan «Astana» oıynshylary birinshi kezeńdi 20:15 esebimen óz paıdalaryna aıaqtady. Ekinshi kezeńde alań ıeleriniń oıynyna qan júgirip, sát saıyn upaılaryn molaıta berdi. Ásirese, Kalpepper-Vıktor-Hemılton úshtigi «Astananyń» qorǵanysyn birinen soń biri buzyp, óz jankúıerleriniń alǵysyna bólendi. Úlken úziliske deıin 24 upaı jıǵan volgogradtyqtarǵa bizdiń basketbolshylar 14 upaımen ǵana jaýap berdi. Eki kezeń qorytyndysy boıynsha «Krasnyı Oktıabr» 39:34 esebimen alǵa shyqty. Nemis mamany Dırk Baýerman jattyqtyratyn jergilikti komanda kelesi kezeńde de qarqynyn joǵaltqan joq. Tipti, bul kezeńde astanalyqtardyń alańda bar-joǵy bilinbedi desek, artyq aıtqandyq emes. Sebebi, 10 mınýt boıy bizdiń komanda bar-joǵy alty-aq upaı jısa, «Krasnyı Oktıabr» qorjyndaryna 19 upaı salyp, jalpy esepti 58:40-qa jetkizdi. Sheshýshi sońǵy kezeńde Býtaýtas shákirtteri jınaqylyq tanytqandaı boldy. Djerrı Djonson, Patrık Kalates, Lýka Andrıch jáne Rashıd Mahalbasıchtar oıyndy qutqaryp qalý maqsatynda aıanyp qalmady. Alaıda, olardyń bul talpynystary tym kesh edi. Tórtinshi kezeń 32:26 esebimen «Astananyń» paıdasyna aıaqtaldy. Desek te, bul kórsetkish ekinshi jáne úshinshi kezeńderde qajet upaılaryna qol jetkizgen volgogradtyqtarǵa oıynda jeńiske jetýge kedergi bolmady. Elordalyqtar VTB lıgasynda osymen besinshi márte qatarynan jeńiliske ushyrady. Oıyn barysynda eń kóp upaı jınaǵan sportshy «Krasnyı Oktıabr» sapyndaǵy Lamont Hemılton. Ol 40 mınýttyń ishinde 23 upaıdyń ıesi atandy. Al 18 upaı jınaǵan Djerrı Djonson «Astana» sapyndaǵy eń mergen oıynshy dep tanyldy. Osy jeńisinen keıin «Krasnyı Oktıabr» týrnır kestesinde «Astanany» aınalyp ótip, pleı-off kezeńine joldama beretin 8-orynǵa jaıǵasty. Bir saty tómen syrǵyǵan astanalyqtar búginde 11-orynda tur. Qos qarsylas maýsym basynda Astanada synǵa túsip, bizdiń komanda 94:76 esebimen jeńiske jetkenin aıta keteıik. «Astana» lıga aıasyndaǵy kelesi oıyndy 13 aqpan kúni fınlıandııalyq «Baızons» komandasyna qarsy ótkizedi. Oǵan deıin, ıaǵnı, 11 aqpanda Evrochelledj týrnıriniń toptyq kezeńinde Italııanyń «Brındızı» komandasymen synǵa túsedi. Bul oıyn Astanadaǵy «Saryarqa» respýblıkalyq velotreginde ótedi. Elaman Qońyr. Derek: egemen.kz. Sýret: bcastana.kz.