Birinshi oqylymda Májiliste depýtattar bastamashylyq etken mádenıet pen bilim máselelerine qatysty zań jobasy talqylanady. Qujatta mektep oqýshylaryn bilim berý jáne mádenı bastamalarǵa qatysýǵa yntalandyrý maqsatymen «Aqylman» jobasyn engizý usynylady. Sondaı-aq ǵylymı jobalardyń halyqaralyq baıqaýlarynyń jeńimpazdary men júldegerlerine, olardy daıyndaǵan pedagogtarǵa bir rettik tólem jasaý normalary qarastyrylǵan.
Bilim sapasyn arttyrý úshin joǵary jáne joǵary oqý ornynan keıingi bilim berý uıymdaryn reıtıngileý normalary engizilmek.
Buǵan qosa memlekettik tapsyrys esebinen oqyǵan azamattardy eger olar memlekettik járdemaqy alýshylar qatarynda bolsa jáne múgedektigi bar balany tárbıelep otyrǵan nemese I toptaǵy múgedekke kútim jasaǵan jaǵdaıda mindetti túrde eńbek óteýden bosatý usynylady. Sonymen qatar sheteldik bilim berý uıymdarynda rezıdentýra, magıstratýra, doktorantýra baǵdarlamalary boıynsha oqýǵa túsken jáne oqýyn aıaqtaǵan azamattarǵa eńbek óteýdi keıinge shegerý múmkindigi qarastyrylǵan.
Depýtattardyń bastamasymen ázirlengen zań jobasy otandyq ádebıetti damytýǵa, kitaphana qoryn qoldaýǵa jáne onomastıka salasyndaǵy ózgeristerge baǵyttalǵan sharalardy da qamtıdy.
Sondaı-aq Májilis jol salasyn reformalaý máseleleri boıynsha jańa zań jobasyn jumysqa alýdy josparlap otyr.
