Foto: gov.kz
Elimizdiń birneshe óńirinde oqytý jáne jumysqa ornalastyrý baǵdarlamalary júzege asyrylyp jatyr. Máselen, Astanada – «Jol Tap» (3,9 myń adam oqýdan ótti), Almaty, Aqtóbe jáne Qaraǵandy oblystarynda – «Jumys Tap» (10 myń adam jumyspen qamtyldy) baǵdarlamalary bar. Sondaı-aq Almatyda «Jobfair365» platformasy jumys isteıdi, onyń kómegimen 2,5 myń jas maman jumysqa ornalasqan.
Astanada «Jol Tap» jobasy aıasynda 19,5 myń azamat memlekettik qoldaýdyń 52 túri boıynsha keńes alǵan.
«Olardyń ishinde 3,9 myń adam 10 túrli mamandyq boıynsha oqytyldy (tiginshi, barısta, satýshy-kassır, elektrgazben dánekerleýshi, býhgalterlik eseptiń negizderi, aıaq kıim jóndeý jáne kilt jasaý, korpýstyq jıhaz jasaý negizderi , maı jáne dóńgelek aýystyrý jónindegi avto-maman, Kaspi dúkenindegi saýda negizderi jáne t.b.). Jastar resýrstyq ortalyqtary 2024 jyly kásiptik baǵdar berý maqsatynda 500-den astam bos jumys oryn jármeńkesin uıymdastyryp, 1 mıllıonnan astam keńes berip úlgerdi (zańgerlik, psıhologııalyq, kásiptik baǵdar, memlekettik baǵdarlamalar, volonterlik, jumyspen qamtý jáne t.b.)», delingen mınıstrlik habarlamasynda.
Bilimi men jumysy joq qazaqstandyq jastarǵa da arnaıy kóńil bólinip jatyr. Mádenıet jáne aqparat mınıstrligi «Zhas project» aıasynda olardy qoldaý úshin 280 grant bólgen. Elimizdiń ár óńirindegi jastardy «Jasyl el» jobasy 20 jyldan beri jumyspen qamtyp keledi. Keıingi 3 jylda 100 myńnan astam jas qamtylsa, onyń 30 myńnan astamy – aýyl jastary.
Memleket jastardy turǵyn úımen qamtýǵa da aıryqsha kóńil bólýde. Osy baǵytta «Otbasy bank» jáne oblys ákimdikterimen birlesip, eldiń 16 óńirinde jumys isteıtin jastarǵa arnalǵan arnaıy ıpotekalyq baǵdarlamalar iske qosylǵan.
«Jastar úshin arnaıy kvotalar qarastyrylǵan respýblıkalyq turǵyn úı baǵdarlamalary da bar. Atap aıtsaq, «Otaý» jáne «Naýryz» baǵdarlamalary. 2024 jyly osy baǵdarlamalar aıasynda 3 923 jas azamatqa jalpy somasy 103,4 mlrd teńge nesıe berildi. «Otaý» baǵdarlamasy boıynsha 1 450 jas azamat jalpy somasy 31,7 mlrd teńge kóleminde nesıe aldy. Jastar saıasatynyń basty baǵyttarynyń biri – kadrlyq áleýetti arttyrý.«Prezıdenttik jastar kadrlyq rezervi» – Memleket basshysynyń tapsyrmasymen 2019 jyldan bastap iske asyp kele jatqan joba. Qazirgi ýaqytta 315 rezervtegi jas memlekettik jáne kvazımemlekettik sektorda basshylyq laýazymdarǵa taǵaıyndaldy», delingen mınıstrlik habarlamasynda.
Jobaǵa qyzyǵýshylyq jyl saıyn artyp keledi (2019 jyly – 13 myń adam, 2021 jyly – 22 myń adam, 2023 jyly – 31 myń adam). Úsh irikteýdiń nátıjesi boıynsha 400 adam Rezervke qabyldandy (2019 jyly – 300 adam, 2021 jáne 2023 jyldary – 50 adam). Olar saıası memlekettik laýazymdarǵa, «A» korpýsyna, sondaı-aq «B» korpýsyndaǵy basshylyq qyzmetterge taǵaıyndalý múmkindigine ıe boldy.
2024 jyly alǵash ret barlyq óńirde aımaqtyq kadrlyq rezervke irikteý ótti. Oǵan respýblıkalyq mańyzy bar qalalar men oblystardyń jergilikti atqarýshy organdary qatysty. 505 adam eki jyl merzimge rezervke qabyldanyp, memlekettik organdardyń kelisimimen «B» korpýsyndaǵy ákimshilik memlekettik laýazymdarǵa konkýrssyz taǵaıyndalý múmkindigi beriledi.
Sonymen qatar, Májilis pen máslıhat saılaýynda jastarǵa arnalǵan arnaıy kvotalar engizildi, bul bastama organdardyń jumysyna jańa serpin berdi.
Budan bólek memleket granttar men syıaqylar arqyly jastarǵa qoldaý kórsetip keledi. 2024 jyly 90 mln. teńgege «Táýelsizdik urpaqtary» granty 30 jasqa tabystaldy. Joba alty baǵyt boıynsha grant bóldi. Atap aıtsaq, ǵylym, mádenıet, IT, medıa, bıznes, volonterlik sekildi taqyryptar qamtyldy. «Daryn» memlekettik jastar syılyǵynyń mólsheri 1 mln teńgege deıin ulǵaıtyldy.
