Sýretti túsirgen – Jangeldi ÁBDIǴALYM
Arqada ótken alqaly jıynǵa QHA tóraǵasynyń orynbasary, Prezıdent Ákimshiliginiń Qazaqstan halqy Assambleıasy hatshylyǵynyń meńgerýshisi Marat Ázilhanov, sondaı-aq kórnekti memleket jáne qoǵam qaıratkerleri, etnosaralyq qatynastardy damytý komıtetiniń ókilderi, basqa óńirlerdiń QHA Aqsaqaldar keńesiniń tóraǵalary qatysty.
Oblys ákimi Ermaǵanbet Bólekpaev quttyqtaý sózinde Assambleıanyń 30 jyl ishinde qoǵamdyq tatýlyq pen aýyzbirlikti bekemdeıtin negizgi ınstıtýtqa aınalǵanyn aıtty.
QHA tóraǵasynyń orynbasary Marat Ázilhanov Aqsaqaldar keńesiniń otyrysyn eńbektiń qara qazany bolǵandyqtan Qaraǵandyda ótkizýdi jón kórdik deıdi.
«Adal azamat» jobasy alǵash ret ótip otyr. Joba jeńimpazdary – eseli eńbekterimen óńirdiń ǵana emes, el damýyna úles qosyp júrgen jumysshy mamandyqtarynyń ókilderi. Komıssııa quramy QHA qurylymdarynyń basshylarynan quraldy. Olar jeti atalym boıynsha úzdik ókilderdi anyqtady. Úmitkerlerdi irikteý kezinde jeńimpazdardyń kásibıligine ǵana emes, jeke qasıetterine de mán berildi.
Sonymen «Ulaǵatty ustaz» atalymynda Temirtaý qalasyndaǵy №14 mektep-lıseıiniń fızıka jáne robottehnıka muǵalimi Vıacheslav Varzın jeńimpaz atandy. 40 jyl eńbek ótili bar ustaz ınformatıka boıynsha avtorlyq baǵdarlama men fızıka boıynsha ǵylymı-ádistemelik keshen ázirlegen. Temirtaýda robottehnıkany birinshi bolyp damytqan muǵalim.
«Eren eńbek ıesi» atalymynyń úzdik ókili retinde T.Kúzembaev atyndaǵy shahtanyń aldyńǵy qatarly uńǵymashysy Nurlan Satmaǵambetov tanyldy. Nurlan Rashıduly – jas kadrlardy tárbıelegen bilikti maman.
«Ádildik saqshysy» atalymy boıynsha Ońtústik-Shyǵys polısııa bóliminiń jergilikti polısııa qyzmeti bólimshesiniń ıývenaldy polısııa tobynyń ýchaskelik polısııa ınspektory Aıdana Shaımerdenova marapattaldy.
Balalar men jasóspirimderge arnalǵan Temirtaý teatrynyń 3-sanattaǵy tiginshisi Tatıana Rýban «Mádenıet maıtalmany» atalymynyń úzdik ókili atandy. 30 jyldan asa ýaqyt tiginshi bolyp jumys isteıtin onyń teatrdyń shyǵarmashylyq ujymyna tikken kıimderi jańashyldyǵymen erekshelenedi.
Qaraǵandy qalasy tótenshe jaǵdaılar basqarmasynyń №10 órt sóndirý bólimi bastyǵynyń orynbasary Magarbı Býzýrkaev «Erjúrek qutqarýshy» atandy. Ol «Hanter» JShS-nyń 10 gaz sısternasynyń jarylysy kezinde órtti sóndirgen brıgadany basqaryp, 53 gaz ballonyn shyǵaryp, qaýiptiń aldyn alady.
Al «Izgilik jarshysy» atalymynyń úzdik ókili bolyp Arına Bekbaeva laıyq dep tanyldy. Jeńimpaz ıesiz qalǵan janýarlarǵa qamqor bolyp, oblysta zoovolonterlikti damytyp júr.
«Abzal jan» atalymynda Qaraǵandy qalasyndaǵy №3 emhananyń otbasylyq densaýlyq ortalyǵynyń bólim meńgerýshisi, medısına úzdigi Ǵalııa Myńtaevanyń baǵy jandy.
Jobanyń bas júldesi kóp jyl fermada saýynshy bolǵan Nesibeldi Dosanovaǵa buıyrdy.
Oblystyq QHA Aqsaqaldar keńesiniń tóraǵasy Bekzat Altynbekov jeńimpazdardy quttyqtap, Qaraǵandy qarapaıym eńbek adamyn qoldaýda únemi alda bolatynyn atap ótti.
Alqaly jıyn ári qaraı Aqsaqaldar keńesiniń «Adal azamat – qoǵam birliginiń negizi» atty respýblıkalyq otyrysymen jalǵasty. Munda etnosaralyq kelisimdi nyǵaıtyp júrgen óńirdegi belsendi aqsaqaldar Alǵyshatpen marapattaldy. Otyrys sońynda qatysýshylar Qaraǵandy tájirıbesi negizinde «Adal azamat» jobasyn masshtabtaý týraly sheshim qabyldady.
Qaraǵandy oblysy
