Foto: Ashyq derekkóz
Qarjylyq monıtorıng agenttiginiń málimetinshe, alaıaqtar 2024 jyldyń naýryz-qyrkúıek aılary aralyǵynda óz shemasyn iske asyryp, azamattardy AQSh-taǵy jarnamalyq qosymshalar platformasyna ınvestısııa salýǵa shaqyrǵan.
Kúdiktiler azamattardy elektrondy krıpto bırja «OKH» arqyly krıptovalıýta satyp alýǵa kóndirgen. Negizgi sharttarynyń biri – keminde 5 jańa salymshyny tartý bolǵan. Qatysýshylar 30-dan 500 AQSh dollaryna deıin qarjy quıyp, óz salymdaryna 2 myń AQSh dollaryna deıin bonýs alady dep sengen.
Alaıda, bul qarjy pıramıdasynyń jalǵan júıe ekeni anyqtalǵan. Jurtshylyqtan jınalǵan qarjy uıymdastyrýshylardyń jeke maqsattaryna jumsalǵan.
«Alaıaqtar jınalǵan aqshany jyljymaıtyn múlik pen banktik depozıtterge aýdaryp Pavlodardan 10 mln teńgege páter satyp alǵan. 8 mln teńgege 4 depozıt ashqan.Qazirgi tańda sot sanksııasymen kúdiktilerdiń jyljymaıtyn múligine jáne bank esepshottaryndaǵy qarajatyna tyıym salyndy», delingen habarlamada.
Uıymdastyrýshylardyń áreketi áshkerelenip, olarǵa qatysty «úı qamaq» jáne «elden ketpeý týraly qolhat» túrinde shekteý sharalary qabyldanǵan. Tergeý jumystary jalǵasyp jatyr.
