Is-sharaǵa halyqaralyq uıymdardyń ókilderi, eldegi etnomádenı jáne jastar birlestikteriniń basshylary men músheleri, memleket, qoǵam qaıratkerleri, barlyǵy 60-qa jýyq adam qatysty. Dóńgelek ústelde Qazaqstan halqy Assambleıasy tóraǵasynyń orynbasary – QHA hatshylyǵynyń meńgerýshisi Marat Ázilhanov osynaý balamasyz uıymnyń eldiń etnostyq jáne mádenı toptary arasynda beıbitshilik pen ózara túsinistikti saqtaýda, áleýmettik-saıası turaqtylyqty ilgeriletýdegi ózindik úlesine toqtaldy.
– Elimiz – mıllıondaǵan azamattyń taǵdyryn bir arnaǵa toǵystyrǵan qutty meken. Táýelsizdik jyldarynyń alǵashqy kezeńinde qurylǵan Assambleıa osy úsh onjyldyqta memlekettiń damýy men turaqtylyǵyna úlken úles qosty. Mańyzdy mıssııany qabyldap, ashyq dıalog, birlik, teńdik qaǵıdatynyń oryndalýyna árekettendi. Jáne bul tájirıbe jahan jurtyna úlgi boldy, – dedi M.Ázilhanov.
Búginde Assambleıa quramynda respýblıkalyq jáne óńirlik etnomádenı birlestikterdiń basshylary men belsendileri, belgili qoǵam qaıratkerleri, saıasatkerler, Parlament pen óńirlik máslıhattardyń depýtattary, bıznesmender, jýrnalıster, shyǵarmashylyq jáne ǵylymı zııaly qaýym ókilderi, aqsaqaldar, jastar qatarynan 2 myńǵa tarta adam bar.
– Assambleıanyń 30 jyldyq joly – bul uıymnyń tarıhy ǵana emes, elimizdiń memlekettik baǵytynyń mańyzdy quramdas bóligi. Bul joldyń negizinde táýelsizdiktiń alǵashqy jyldarynda qalyptasqan ulttyq birlik, ózara qurmet jáne jasampaz dıalog ıdeıasy jatyr. Otandastarymyz «Alýan túrliliktegi birlik» qaǵıdatyn berik ustanady. Bul oraıda Qazaqstan halqy Assambleıasynyń mereıtoıy tek qorytyndy shyǵarý úshin ǵana emes, sondaı-aq oryn alyp otyrǵan problemalardy, olardy sheshý joldaryn jáne etnosaralyq qatynastar salasyn odan ári damytý keleshegin keńinen jáne ashyq talqylaý úshin de mańyzdy, – dedi PIB Prezıdenttik ortalyǵynyń dırektory Baqytjan Temirbolat.
Assambleıanyń mereıin asyryp otyrǵan tushymdy jobalary kóp-aq. Mádenıet jáne aqparat mınıstrligi Etnosaralyq qatynastardy damytý komıtetiniń «Qoǵamdyq kelisim» RMM dırektorynyń orynbasary Rýfına Ýsanova biregeı uıym tek etnostardyń mádenıetin damytatyn ınstıtýt emes ekenin aıtty.
– Negizi Assambleıada túrli jobalar bar. Onyń ishinde qaıyrymdylyqqa, memlekettik tildiń qoldaný aıasyn keńeıtý baǵytynda, qoǵamdaǵy ótkir máselelerdiń túıinin tarqatýǵa septesin bastamalary bar. Sondyqtan QHA – jalpy otandyq birlik modelin nasıhattaıtyn ınstıtýt, – dedi ol.
