Qytaıda qylmystyq top qurǵany jáne adam óltirgenderi úshin ólim jazasyna kesilgen mıllıarder Lıý Han men onyń inisi Lıý Veıge, sondaı-aq, qylmystyq toptyń taǵy úsh múshesine qatysty shyǵarylǵan úkim oryndaldy.
Tergeý málimetterine qaraǵanda, Lıý Han 1993 jyly óz inisimen birge qylmystyq top qurǵan. Qylmystyq top músheleri negizinen Sychýan provınsııasyndaǵy jergilikti kásipkerler qyzmetin baqylaýlaryna alypty. Sonymen qatar, olardyń toǵyz adamdy óltirgenderi dáleldengen. 2014 jyldyń mamyrynda Lıý Hanmen birge, bandanyń tórt múshesi ólim jazasyna kesilip, qylmystyq toptyń 30-dan astam qatysýshysy ártúrli merzimge bas bostandyqtarynan aıyrylǵan bolatyn. «Reıter» agenttiginiń habarlaýynsha, Lıý Hannyń isi QKP OK saıası bıýrosy turaqty komıtetiniń burynǵy múshesi Chjoý Iýnkanmen baılanysty bolýy múmkin. Qylmystyq is qozǵalǵanǵa deıin Lıý Han «Hanlýn» taý-ken óndirý korporasııasyn basqarǵan edi.
Basqa jol qalmaǵanyn málimdedi
AQSh federaldyq rezervter júıesiniń burynǵy basshysy Alan Grınspen Grekııa eline eýroaımaqtan shyǵýdan basqa jol qalmaǵanyn málimdedi. Muny ol jeksenbi kúni «BBC Radio 4» radıostansasynyń efırinde aıtqan.
Alan Grınspenniń málimdeýinshe, Grekııa solshyl úkimetiniń qaryzdardy tóleý sharttaryn qaraýǵa tyrysatyn basqa joldary joq. «Men Grekııanyń eýroaımaǵyna qatysýy jaǵdaıǵa kómektesetinin kórip otyrǵan joqpyn. Qazir bóliný – eń durys strategııa», depti ol. Sonymen birge, eks-tóraǵa osy eldiń valıýtalyq odaqtan shyǵýy Eýropanyń qarjy naryǵynda turaqsyzdyq týdyratynyn da atap ótipti. Osy jyldyń qańtarynda ótken saılaýda jeńiske jetken SIRIZA partııasy «nesıeshiler úshtiginen» Grekııaǵa bergen 320 mıllıard eýrony quraıtyn qaryzdy qaıta qurylymdaýdy nemese esepten shyǵarýdy talap etken bolatyn. Buǵan Eýropa odaǵy da, Eýropalyq ortalyq bank te qarsy bolyp otyr.
Jeti myńdaı sodyrdyń kózi joıyldy
Sońǵy aptalarda Sırııa men Iraktaǵy halyqaralyq koalısııa kúshteriniń terrorshyldyqqa qarsy júrgizgen operasııalarynyń nátıjesinde «Islam memleketiniń» eń keminde 7 myń sodyrynyń kózi joıylǵan. Bul derekti Iordanııa áskerı áýe kúshteriniń qolbasshysy, general Mansur Saleh ál-Jabýr keltirdi.
«Biz oılaǵan maqsatymyzǵa qol jetkizýdemiz. Sodyrlardyń logıstıkalyq ortalyqtaryn, qarý qoımalary men olardyń panalaıtyn jerlerin talqandadyq. Bizdiń eń basty maqsatymyz – «Islam memleketin» jer betinen tolyqtaı joıý», – dep atap ótipti general. Sonymen qatar, qolbasshy halyqaralyq koalısııanyń endigi maqsaty – «Islam memleketiniń» jetekshisi Ábý Bákir ál-Baǵdadıdiń kózin joıý, olardyń komandalyq ortalyqtary men sodyrlardyń jattyǵý bazarlaryn talqandap, zańsyz munaı satýdyń jolyn kesý ekendigin de aıtqan. Sebebi, zańsyz munaı operasııalaryn jasasý ekstremısterdi qarjylandyrýdyń negizgi kózi bolyp otyr. О́tken úsh kúnde halyqaralyq koalısııa kúshteri sodyrlarǵa qarsy 56 áýe shabýylyn jasaǵan.
Tártipsizdik saldarynan ajal qushty
Kaırdiń shyǵys jaq bóliginde polıseılermen bolǵan qaqtyǵys kezinde jıyrmadan astam fýtbol jankúıeri ajal qushqan. «Novostı» aqparat agenttigi Mysyrdyń bas prokýratýrasyna silteme jasaı otyryp, osylaı dep habarlady.
Qaqtyǵys el astanasynyń Tagammý Hamıs aýdanyndaǵy «PVO» stadıonynda mysyrlyq «Zamalek» klýby men «Inbı» fýtbol klýbynyń kezdesýine shamaly ǵana ýaqyt qalǵanda oryn alǵan. Qaza tapqandardyń barlyǵy «Zamalek» klýbynyń jankúıerleri eken. Eldiń ishki ister mınıstrligi ókiliniń aıtýyna qaraǵanda, bıleti joq jankúıerler stadıonǵa basa-kóktep kirmek bolypty. Al polıseıler olarǵa qarsy kózdi jasaýratatyn gaz qoldanǵan. Qaza tapqandar osy gazdan ýlanǵan.
Elý tórt jyldan soń...
Chılıde osydan 54 jyl buryn apatqa ushyraǵan jolaýshylar ushaǵynyń synyqtary tabyldy. Aqparat kózderiniń habarlaýynsha, ushaq synyqtaryna alpınıster kez bolǵan.
Ekspedısııaǵa qatysýshylar ushaq synyqtary el astanasy – Santıagonyń ońtústiginde jerden 3200 metr bıiktikten tabylǵanyn aıtady. Alpınısterdiń biri – Leonardo Albornostyń málim etýinshe, ushaq fıýzelıajiniń úlken bóligi bútin kúıinde jatyr. Sondaı-aq, apat bolǵan jerden qaza tapqandardyń súıekteri de kezdesken. Ushaq synyqtarynyń tabylǵan jeri qazirshe qupııa saqtalyp otyr. Chılılik «LAH» avıakompanııasynyń ushaǵy 1961 jyldyń 3 sáýirinde apatqa ushyraǵan eken. Bortynda 24 adam bolypty.
Terrorlyq áreketpen «atap ótti»
Osydan eki kún buryn Irak úkimeti 2004 jyldan beri Baǵdad qalasyna engizilgen komendattyq saǵat ýaqytyn alyp tastaǵan edi. Osy másele terrorlyq áreketpen «atap ótilip» otyr.
El astanasy – Baǵdadta jasalǵan jarylystan 15 adam mert bolyp, taǵy 45 adam jaralanǵan. Oqıǵa bylaı bolypty: terrorshy-jankeshti beline baılanǵan bombany shııtter kóp turatyn aýdanda iske qosqan. Bul Adan alańyna adam kóp jınalǵan kez bolsa kerek. Qaıǵyly jaǵdaıdyń jaýapkershiligin ázirge eshkim moınyna alǵan joq. Atap óteıik, ótken jyldyń jazynan beri Irak aýmaǵynda «Islam memleketiniń» terrorshyl toptary jumys istep keledi. Olardyń qolynan qaza tapqandar sany birneshe myńǵa jýyqtaıdy.
Qysqa qaıyryp aıtqanda:
*Máskeý qalasynyń sotyna tergeý oryndarynan Borıs Berezovskııdiń kúıeý balasy Georgıı Shýppeni syrttaı qamaýǵa alý jóninde ótinish túsken. Onyń Borıs Berezovskııdiń ólimine qatysy bar bolýy múmkin.
*Indonezııanyń qaýipsizdik kúshteri «Tarýna Makmýr» kemesi sýǵa batyp ketýi múmkin degen aqparatty tekserýde. Keıbir derek kózderi keme bortynda 197 jolaýshy bolǵanyn alǵa tartady.
Grýzııanyń premer-mınıstri Iraklıı Garıbashvılı naqty nátıjelerge qol jetkizý jaǵdaıynda Reseı basshysy
*Vladımır Pýtınmen únqatysýǵa daıyn ekenin málimdedi.
AQSh-tyń Djordjııa shtatynda atys saldarynan bes adam ólip, eki adam jaralanǵan. Oqıǵa Dýglasvıll qalasyna jaqyn mańda bolǵan.
Internet materıaldary negizinde ázirlendi.
