Sýretti túsirgen – Aıaýjan О́teýlınova
Bıyl Shyǵystan shyqqan qos qalamger – Qalıhan Ysqaq pen Dıdahmet Áshimhanulynyń mereıtoılary. Osy ataýly kúnderge arnalǵan is-sharalar legi aqyn Aqtan Nurbaev atyndaǵy aqyndar mektebiniń ashylýymen bastaldy. Aqtan Nurbaev aqyn keńes kezeńinde óńirimizde aıtys ónerin damytýǵa atsalysqan edi. Jazǵan óleńderi de órilip túsken, maǵynasy tereń. Aqyn atyndaǵy mektep aıtys ónerine den qoıǵan daryndy jastardyń basyn qosyp, baǵyt-baǵdar berip, talanttaryn shyńdaýdy maqsat etken. Lentasyn aıtystyń atasy Júrsin Erman, aqyn Ulyqbek Esdáýlet, jazýshy Álibek Qańtarbaı qıǵan soń jańa orta ilgeri basyp, irgeli mektepke aınalýǵa tıis te. Bul is-sharadan soń qurmetti qonaqtar aıtysqa asyqqan. Keń saraıdyń ishinen ıne shanshyr oryn tappaǵan kórermen syrtqa jaıǵasyp, aıtys tyńdaýǵa yńǵaılanypty. Alaıda orynnyń bolmaǵanyna eshkim qabaq shytpady. Kerisinshe rýhanı keshke halyqtyń kóptep jınalǵany qýantty.
Aıtys á dep bastalǵanda-aq tyńdarmandy uıytyp áketti. Aqyndar bir-birimen tistesip, ázildesip, jyr shýmaqtaryn tókkende kórermen «bárekeldi» desip, qolpashtap otyrdy. О́ńirdiń máselelerin de túırep ótti. Rústem Qaıyrtaı oblystyq drama teatrǵa Qalıhan Ysqaqtyń atyn berý kerek dep bir orap ótse, jazýshynyń aýylynda aýyzsýdyń joqtyǵyn aıtyp, bir túıredi.
Aıtys keshke deıin jalǵasty. Oryn alyp úlgermegen kórermen sol qalpy tikesinen tik turyp tamashalady. Qandaı mega juldyz kelip óner kórsetse, sońyna deıin shydamas edi el. Bul degenimiz tól ónerdiń qudireti dersiz. Sóıtip, aıtystyń bas báıgesi jergilikti aqyn Serik Qýanǵanǵa buıyrsa, birinshi oryndy Rústem Qaıyrtaı enshilep, Altyn dombyraǵa joldama aldy. Ekinshi oryndy Aspanbek Shuǵataev pen Iranǵaıyp Kúzenbaev aldy. Al úshinshi oryn Jansaıa Mýsına men Birjan Baıtýovqa berildi.
Jazýshylarǵa arnalǵan rýhanı is-sharalardyń bul – basy. Dúbirli toı jazdyń kúni týǵan jerlerinde jalǵasyn tabady.
О́skemen
