Tótenshe jaǵdaı qyzmeti mamandarynyń pikirinshe, mundaı format órtterge, jol-kólik oqıǵalaryna, ózge de tótenshe jaǵdaılarǵa tez arada den qoıýǵa múmkindik beredi. Pavlodar qalasynan 100 km jerde ornalasqan jańa keshen – elimizdegi úshinshi nysan. Onyń biregeıligi – birneshe shuǵyl qyzmettiń birge qyzmet atqarýyna jaǵdaı jasalǵan. Iаǵnı bir aýmaqta órt sóndirý bólimi, Apattar medısınasy ortalyǵynyń trassalyq medısınalyq-qutqarý beketi toǵysqan. Jaqyn arada munda oblystyq tótenshe jaǵdaılar departamenti jedel-qutqarý jasaǵynyń qyzmetkerleri jumys isteı bastaıdy.
– Mınıstrlik aýyldy jerlerdegi qaýipsizdikti arttyrýǵa baǵyttalǵan «Aýyl qutqarýshylary» baǵdarlamasyn iske asyrýdy jalǵastyryp jatyr. Birlesken qyzmet ýaqytty qysqartýǵa múmkindik beredi. Tótenshe jaǵdaıdyń sıpatyna qaramastan, ıaǵnı órt, jol-kólik oqıǵasy nemese shuǵyl medısınalyq kómek bolsyn, mamandar úılesimdi, jedel, tıimdi áreket etedi. Nysandy jańartý bıýdjet qarajatynsyz júzege asyryldy. О́rt sóndirýshilerdi, qutqarýshylar men dárigerlerdi bir bazada biriktirý jaı ǵana yńǵaılylyq úshin jasalǵan dúnıe emes. Bul – tótenshe jaǵdaıdan zardap shekkenderge alǵashqy mınýttarda jedel kómek kórsetýdiń naqty múmkindigi. Mundaı keshenderdiń avtojoldardyń strategııalyq mańyzdy ýchaskelerinde ornalasqany jón, – dedi nysannyń ashylý saltanatyna qatysqan Tótenshe jaǵdaılar mınıstri Shyńǵys Árinov.
Ortalyqtyń Aqqýly aýdanynda oryn tebýi onyń strategııalyq mańyzdylyǵyn eskere otyryp tańdalǵan. Sebebi ol Pavlodar oblysynyń aýmaǵyn ǵana emes, «Semeı ormanyn» da qamtı alady. Rezervattar men kóliktiń jetýi qıyn ýchaskelerge de kómek kórsetýge múmkindik beredi. Keshen tótenshe jaǵdaı saldaryn joıýǵa qajetti zamanaýı tehnıkamen, jabdyqtarmen jaraqtalǵan. Aýmaǵynda zardap shekkenderdi shuǵyl evakýasııalaý, qutqarý toptaryn shalǵaı aýdandarǵa jedel tasymaldaýǵa laıyqtalǵan tikushaq alańy qarastyrylǵan.
Eki qabatty ǵımaratta mamandar táýlik boıy kezekshilik etedi. Jeke quramǵa qolaıly jaǵdaı jasalǵan: demalýǵa arnalǵan, jýynatyn bólmeler, as úı, sondaı-aq arnaıy tehnıkaǵa qyzmet kórsetetin tehnıkalyq aımaq qarastyrylǵan. Mınıstr atap ótkendeı, buǵan deıin mundaı keshender Aqmola, Qaraǵandy oblystarynda paıdalanýǵa berilgen. Is-shara sońynda qyzmetkerlerge jańa arnaıy tehnıkanyń kiltteri, Alǵyshattar tabys etildi. Sondaı-aq óńirlik departamenttegi birneshe qyzmetkerdiń kásibıligi men adaldyǵy atap ótilip, olarǵa kezekten tys shender berildi.
Pavlodar oblysy,
Aqqýly aýdany
