Ol ál-Farabı atyndaǵy QazMÝ-diń jýrnalıstıka fakýltetin bitirgen soń Almatyda aıaldamady. О́ziniń balalyq shaǵy ótken Inderbor kentindegi qarashańyraǵyna oraldy. Bálkim, ánderiniń deni jurtshylyqqa keńinen tanylǵan asqaq Alataý etegindegi Almatyny ańsaǵan shyǵar. Biraq alystaǵy aýdan ortalyǵynda turǵanymen, bozbala kúninen serigine aınalǵan gıtarasyn buryshqa súıegen joq.
Stýdent kezinde qazaqtyń talantty shaıyrlary Muqaǵalı Maqataev, Farıza Ońǵarsynova, Esenǵalı Raýshanov, Svetqalı Nurjanovtyń, ózge de aqyndardyń óleńderine birneshe án jazdy. Sózin de, ánin de ózi jazyp, gıtaramen oryndaǵan tól shyǵarmasy kóp. Qazir onyń «Unatamyn men seni», «Bıiktik», «Sáıgúlik» jáne basqa da ánderi jıi oryndalyp júr.
Tabyldynyń qaı ánin tyńdasańyz da jalyqtyrmaıdy. Kóńildi sergitedi, rýhty serpiltedi. Muńǵa batyratyn ánderiniń ózi oılandyrady. Án ıirimi tereńine tarta túsedi. Bir áni kelesige jeteleı beredi. Tyńdaı bergiń keledi. Stýdent kezinde shyǵarǵan ániniń biri «Men qazaqpyn...» dep atalady. Alǵashqy shýmaqtaǵy «Men qazaqpyn, júre almaıtyn, Shattanbasa, kúlmese. Men qazaqpyn, Ishken asyn tastaı salar jyr dese. Men qazaqpyn, Ashýlanyp, talaq qylar tirlikti, Shaıǵa bola bir kese» degen joldardan ulttyń bolmysy taıǵa tańba basqandaı órilgen.
Jurtshylyqtyń nazaryn aýdarǵan shyǵarmasynyń qatarynda «Bıiktik» áni de bar. Bul ánde onyń ókinishi de, úmiti de kórinis tapqan. О́kinishi – «qara altyndaı» qazynasy mol Atyraýyna taý ákele almaǵany. «Unatady shyńda kóńil shyrqaýdy, Taýlary joq tóbemizden bult aýdy. Tolaǵaı bop týylmadym, átteń-aı, Atyraýǵa ákeler me em bir taýdy» degen joldardan munaıly óńirdiń ala shańy aspanǵa kóterilgen jazyq dalasy elesteıdi.
Aqynnyń úmiti qandaı asqaq edi? «Alty Alashtyń alyptary berse dem, Taýsyz ǵumyr kesherime men senem. Bıiktikti aınalaıyn, týǵan el, Qyranynyń qanatymen ólshegen». О́zi jyrlaǵandaı, obany – adyr, al adyrlardy tóbe deıtin óńirde aspanǵa qol sozǵan qyr balasy ekenin maqtanysh etti.
Alla aqynnyń aýzyna sóz salady deıtin támsil ras sekildi. Tabyldynyń keı óleńinen onyń taǵdyry ańǵarylady. «Atyńdy seniń aıtamyn án qylyp nege? «Qozym-aý» deshi kúlimdep Baıandaı maǵan. Tirlikti mynaý, janym-aı, máńgilik deme, Uıyqtap ketsem bir kúni, oıanbaı qalam...» dep jyrlaǵanyndaı, 45 jasynda ómirden ótti.
Tabyldynyń óleń-ómiri men óneriniń núktesi qoıylǵan joq. Dál solaı bolaryn myna bir shýmaqqa syıǵyzypty. Muny «Útirmen seni bitirdim, Bitirmeı, jyrym, núktemen. Bergi jaǵynda útirdiń, О́leń-ómir tur bitpegen. Osylaı deýdi qup kórdim, Oqyrman, sen qoı núktesin. Adamdyq ǵumyr bitken kún, Aqyndyq ǵumyr bitpesin!» degeninen ańǵarýǵa bolady. Onyń núktesi qoıylmaǵan án notasy áli talaı urpaqqa jalǵasady.
О́nerin baǵalaıtyn, keıingi urpaqqa nasıhattaıtyn eli bar da talanttyń aty óshpeıdi. Shyǵarmashylyq murasy joǵalmaıdy. Sonyń dálelindeı 2019 jyly týǵan jeri – Inderbor kentinde eńseli eskertkishi ornatyldy. Belgili músinshi Baqytbek Muhametjanov sáýlettik kompozısııany qoladan quıdy. Bıiktigi – 2 metr 60 sm. Tabyldy Dosymovtyń 45 jasta ómirden ótkenin bildiretin 4,5 metrlik granıtke óleńderi qashalyp jazyldy.
Batyr tulǵasymen, bardtyq ónerimen el jadynda saqtalǵan Tabyldy Dosymovtyń eń qundy murasy – óleńderi men ánderi. Al onyń kózi tirisinde qolynan tastamaǵan gıtarasy men ózge de buıymdary qundy jádiger retinde saqtalýy qajet.
Bardtyń «Jalǵan dúnıe» dep atalǵan óleńinde «Sol jaqqa attanasyń bári barǵan, Qalady kókiregińde alyp arman. Qalady aýyzyńda sary tisiń, Qalady garajyńda sary «Volgań» degen shýmaq bar. Jaıyq jaǵasyndaǵy aýylda júrip, bardtyq ónerdiń zańǵar bıigine kóterilgen talantty kompozıtor nege bulaı jazdy eken? Úlkender aıtatyndaı, túısigi bes kúndik jalǵan ómirdiń ólsheýli ekenin sezgeni me? Álde kezdeısoqtyq pa, kózi tirisinde mingen «Volga» kóligi ıesin kútken aqboz at sekildi úıiniń aýlasynda tur.
Atyraý oblysy ákiminiń orynbasary Daryn Shamuratovtyń aıtýynsha, aqyn ári kompozıtordyń shyǵarmashylyǵyn dáripteý – búgingi býynǵa paryz. Onyń shyǵarmashylyq murasyn jas urpaqqa keńinen nasıhattaý kózdelip otyr.
«Bıyl bard-aqyn Tabyldy Dosymovtyń týǵanyna 60 jyl tolady. Osyǵan oraı aqyn mingen «Volga» avtokóligi restavrasııadan ótkiziledi», deıdi D.Shamuratov.
Jańartylatyn «Volgasy» jádiger retinde mýzeıge qoıylady eken. Qazaqtyń rýhyn kóteretin, keıde muńǵa batyryp, keıde oınaqy ázilmen ezý tarttyrar ánderiniń qoljazbalary men notalary da Tabyldy Dosymovtyń ónerinen syr shertip turǵany jón.
Atyraý oblysy
