Foto: TSM Sportty damytý dıreksııasy
Álem chempıonatyndaǵy alǵashqy altyndy 48 kelide Nazym Qyzaıbaı qorjynǵa saldy. Nazym Qyzaıbaı fınaldyq aıqasta Reseı ókili Iýlııa Chýmgalakovamen kezdesti. Qos sportshy da rıngtiń ortasyn bermeýge tyrysyp, aıanyp qalmady. Áıtse de tájirıbeli Nazym soqqy almasýda jyldamdyq tanytyp, jekpe-jekti óz paıdasyna sheshti. Esep: 5:0. Osylaısha Parıj Olımpıadasynyń qola júldegeri araǵa alty aı salyp, halyqaralyq dodada altyn medal enshilep, el tarıhynda úsh dúrkin álem chempıony bolǵan alǵashqy boksshy atandy.
Tarıhı jeńisten keıin Memleket basshysy Qasym-Jomart Toqaev onyń jeńisin aıtýly jetistik dep baǵalap, quttyqtady.
Ekinshi altyn júldeni 50 kelide el namysyn qorǵaǵan Alýa Balqybekova enshiledi. Ol fınalda Qytaıdyń jas boksshysy Hý Meıımen shyqty. Jerlesimiz kezdesýdi tolyqtaı óz baqylaýyna alyp, jyldamdyq jaǵynan bir bas joǵary boldy. Esep: 5:0. Osylaısha, Alýa Balqybekova alǵash ret álem chempıonatynyń birinshi tuǵyryna kóterildi. Otandasymyz buǵan deıingi álem chempıonattarynda 2022 jyly -kúmis, 2023 jyl - qola júldege qol jetkizgen edi.
Úshinshi altyn medaldi Aıda Ábikeeva taǵyndy. 63 kelide alǵash ret fınalǵa shyqqan Aıda Ábikeeva Taıland ókili Tananıa Somnýekke esh múmkindik qaldyrmady. Qos boksshy 2024 jylǵy Azııa chempıonatynda da joldary túıisip, Aıda basym túsken bolatyn.
Fınaldyq aıqasta ǵana aıy ońynan týmaǵan 60 kelidegi Vıktorııa Grafeeva men 81+ kelide baq synaǵan Eldana Talıpova kúmispen kúpteldi.
70 kelide sharshy alańǵa shyqqan Natalıa Bogdanova qola júldeni qanaǵat tutty.
