Sot anyqtaǵandaı, kámeletke tolmaǵan L. men T. jábirlenýshini óz úıiniń aýlasynda jolyqtyrǵan. Buryn L. men B. arasynda janjal týyndap, sońy tóbeleske ulasqan. Keıin olarǵa M., V., S. jáne Sh. qosylyp, jábirlenýshige shaǵymdaryn aıtqan.
- L., T., M. jáne V. jábirlenýshi B.-ny qazandyq aýmaǵyna aparyp, oǵan dene jaraqatyn salǵan. Osy ýaqytta M., V. jáne Sh. bolǵan jaǵdaıdy telefonǵa túsirgen. Keıin bul vıdeo qalalyq pablıkterdiń birinde jarııalandy, – dep habarlady Abaı oblystyq sotynyń baspasóz qyzmeti.
Úsh jasóspirimge qatysty talap-aryz qanaǵattandyrylmady. Olardyń ekeýi 11 jasqa tolmaǵan, al zań boıynsha arnaıy mektepke tek osy jastan bastap jiberýge bolady. 12 jastaǵy vıdeoǵa túsirgen qyz arnaıy esepte turmaǵan, júıeli quqyq buzýshylyq jasamaǵan jáne oqý úlgerimi jaqsy bolǵan. Degenmen, úsheýi de jasóspirimder isi jónindegi polısııa esebine qoıyldy. Qalǵan úsh jasóspirim arnaıy mektepterge jiberildi.
- 13 jáne 16 jastaǵy eki qyz devıantty minez-qulyqtaǵy balalarǵa arnalǵan arnaıy mektepke jiberildi. Sot olardyń biri júıeli túrde bilim alýdan jaltarǵanyn, kolledjde kóp ret sabaq bosatqanyn anyqtady. Sondaı-aq, bul qyzdardyń júıeli túrde quqyq buzýshylyq jasaǵany: alkogoldi ishimdikter ishý, túngi ýaqytta eresekterdiń qaraýynsyz kóshede júrý sekildi áreketteri belgili boldy. Qyzdardy arnaıy mektepke tórt aı merzimge jiberý týraly sheshim qabyldandy. Eger qajettilik týyndasa, minez-qulqy túzelmegen jaǵdaıda, bilim berý uıymynyń ótinishi boıynsha merzim uzartylýy múmkin, – dep habarlady Abaı oblystyq kámeletke tolmaǵandardyń isteri jónindegi mamandandyrylǵan aýdanaralyq sotynyń tóraıymy Qarlyǵash Qasymova.
13 jastaǵy bir ul bala alty aı merzimge erekshe tártiptegi mektepke jiberildi. Sottyń málimetinshe, ol osy jyldyń eki aıynda eki qylmys jasaǵan, biraq jasyna baılanysty qylmystyq jaýapkershilikke tartylmaǵan.
- Ol urlyq jáne buzaqylyq áreketterin jasaǵan. Eki qylmystyq is te onyń qylmystyq jaýapkershilikke tartylatyn jasqa tolmaýyna baılanysty toqtatyldy. Onyń shynaıy ókinýin eskere otyryp, alty aı merzimge erekshe tártiptegi mektepke ornalastyrý týraly sheshim qabyldandy, – dep túsindirdi Qarlyǵash Qasymova.
Eske salsaq, Semeıde asa qatygezdikpen jasalǵan oqıǵa qoǵamdy dúr silkindirdi. 24 aqpanda áleýmettik jelilerde jasóspirimderdiń balany jerge qulatyp, tepkilep, onyń basynan teýip, ústine sekirip, túrli jolmen qorlaǵan vıdeosy tarady.
