Sýretti túsirgen – Valerıı Býgaev
Jýyrda oblys ortalyǵyndaǵy «Pavlodar avtokombınaty» JShS «Yutong» markaly jańa 20 avtobýspen tolyqty. Ár avtobýstaǵy otyratyn oryndar sany – 35, jalpy syıymdylyǵy – 93 adam. Jolaýshylarǵa yńǵaıly bolý úshin kólikter pandýstarmen, aýa baptaǵyshtarmen, radıatorlarmen jabdyqtalǵan. Osylaısha, seriktestik jolaýshylardyń alǵysyna bólenip jatyr.
– Jańa avtobýstar №1, №1E baǵyttaryna shyǵady. 2024 jyly ákelingen 20 avtobýs №2, №9 baǵyttaryna qaıta bólinedi. Búgingi tańda avtokombınat jelisinde 55 avtobýs jumys isteıdi, onyń 40-y jańa. О́ńir bıligi qoǵamdyq kóliktiń jumysyn jaqsartýmen úshinshi jyl qatarynan júıeli aınalysyp keledi. Sýbsıdııalaýdy engizý, elektrondy bılet júıesin engizý, jolaýshylar aǵynynyń ashyqtyǵyn qamtamasyz etýdiń arqasynda aıtarlyqtaı nátıjelerge qol jetkizildi, – dep habarlady oblys ákiminiń baspasóz qyzmetinen.
Kásiporyn dırektory Aleksandr Panchenkonyń aıtýynsha, kúzge salym taǵy 15 avtobýs satyp alyp, olardy №18, №27 baǵyttarǵa jiberetin oılary bar. Osylaısha, bıyl tasymaldaýshynyń barlyq alty baǵytyndaǵy kólikter jańartylady.
Taǵy bir iri tasymaldaýshy – «№1 avtobýs parki» JShS qala ishinen ónerkásiptik aýdanǵa kóship, ornalasqan jerin ózgertken edi. О́ńir basshysy Asaıyn Baıhanov atalǵan kásiporynǵa baryp, parktiń jaı-kúıin zerdeledi. 1957 jyly negizi qalanǵan kompanııanyń menshik ıesi aldyńǵy jyly aýysyp, ınvestor eki jyldyń ishinde tasymaldaý sapasyn jaqsartý maqsatynda avtopark pen onyń ınfraqurylymyn jańartýǵa shamamen 10 mlrd teńge qarajat quıdy.
Kompanııa ókilderi aımaq basshysyna jańartylǵan avtobýs parkin kórsetip, júrgizýshiniń Face ID arqyly kásiporynǵa kirýinen bastap marshrýtqa shyǵýyna deıingi tolyq jumys sıkli týraly baıandady. Dıspetcherlik, medısınalyq kabınettiń jumysymen tanystyrdy. Sondaı-aq ákim kún saıyn 4-5-sanattaǵy mehanıkter men slesarlar brıgadasy jumys isteıtin jóndeý aımaǵynda boldy. Kásiporynda zamanaýı avtomattandyrylǵan jýý, maı aýystyrý, keń bokstar, menshikti janarmaı quıý beketi jabdyqtalǵan. Júrgizýshilerge demalatyn oryn, tamaq ishetin, kıim aýystyratyn, jýynatyn, kir jýatyn bólmeler qarastyrylǵan. Búginde kásiporynnyń 20 avtobýs baǵytynda 260 júrgizýshi jumys isteıdi. Avtoparkte 2023–2024 jyldary shyǵarylǵan 130 avtobýs, 2019 jylǵy 30 avtobýs bar.
«Áleýmettik mańyzy bar jolaýshylar tasymalyna baǵyttalǵan sýbsıdııalardyń bıznesten ketpeı, kásiporyndy damytý úshin qaıta ınvestısııalanǵanyna qýanyshtymyn», dep atap ótti oblys ákimi.
Quryltaıshynyń aıtýynsha, avtopark qala syrtyna kóshýden utylmaǵan. Burynǵy avtopark turǵyn úılerdiń dál ortasynda ornalasqan edi. Qala turǵyndary avtobýstardyń jınalýyna, tańerteń, keshki ýaqyttarda kólikterden shyǵatyn gazdar men shýǵa jıi shaǵymdanatyn. Qazir ol qubylys sap tyıylǵan.
«Jańa baza burynǵydan eki ese úlken. Biz mamandandyrylǵan avtoparkti josparlap, iske asyrdyq. 2025 jyldyń josparynda qosymsha 20 avtobýs satyp alý, shatyrdy, kirme torapty aýystyrý, ǵımarattyń ekinshi, úshinshi qabattaryn jóndeý, aýmaqty asfalttaý kózdelip otyr. Qysqasy, aldaǵy ýaqytta qyzmetkerlerimizge barynsha qolaıly jaǵdaı týdyrýdy jalǵastyra beremiz. Bul óz kezeginde jolaýshylar tasymalynyń sapasyn odan ári jaqsartýǵa septigin tıgizedi», dedi №1 avtoparktiń quryltaıshysy Rızvan Sınaev.
Pavlodar oblysy
