Is-sharaǵa Agenttik tóraǵasy Darhan Jazyqbaı, Parlament Májilisiniń Zańnama jáne sot-quqyqtyq reforma komıtetiniń tóraıymy Snejanna Imasheva, Parlament Májilisiniń depýtattary qatysty.
Kóshpeli otyrysta Darhan Jazyqbaı Prezıdenttiń tapsyrmasyna sáıkes memlekettik qyzmet júıesin keshendi jańǵyrtý maqsatynda júzege asyrylyp jatqan Agenttiktiń bastamalaryna toqtaldy. Ol azamattardyń suranystaryna jaýap beretin servıstik memlekettik apparatty qalyptastyrýdy odan ári zańnamalyq turǵydan jetildirý barysy týraly aıtty.
Agenttik tóraǵasy «Qazaqstan Respýblıkasynyń memlekettik qyzmeti týraly» jańa Zań jobasy qazirgideı tek eńbek qatynastaryn ıaǵnı, memlekettik qyzmetke kirý, ótkerý jáne ony toqtatý máselelerin retteýmen shektelmeı, eń bastysy memlekettik qyzmetshilerdiń minez-qulqynyń adamǵa baǵdarlanǵan úlgisin bekitýdi kózdeıtinin atap ótti.
Jańa Zań jobasynda merıtokratııa qaǵıdattaryn ilgeriletý, bos laýazymdarǵa irikteý men taǵaıyndaýdyń ashyqtyǵyn qamtamasyz etý, talanttardy izdeý jáne jastardy memlekettik qyzmetke erte kásiptik baǵdarlaý, qyzmetshilerdi kásibı damytýdyń jańa tetikterin engizý josparlary qarastyrylǵan. Sondaı-aq memlekettik qyzmettegi ınstıtýsıonaldyq sabaqtastyqty nyǵaıtý, memlekettik qyzmetshilerge áleýmettik kepildikterdi jaqsartý sharalary da qamtylǵan.
Darhan Jazyqbaı baǵalaý, oqytý jáne taǵylymdama nátıjelerin eskere otyryp, bir laýazym sheńberinde «B» korpýsy qyzmetshilerine klass taǵaıyndaý arqyly kóldeneń ósý tetigi engiziletinin atap ótti. Zań jobasynda memlekettiń qyzmettegi kadrlyq irikteýdi edáýir keńeıtý úshin ishki konkýrstardy alyp tastaý kózdelip otyr.
Is-sharada memlekettik qyzmetshilerge memleket pen qoǵamnyń múddelerin qorǵaý qajettiligi týyndaǵan jaǵdaıda jaýapkershilikpen basqarýshylyq sheshimder qabyldaýǵa múmkindik beretin normalardy Zań jobasyna engizý maqsaty qoıylǵany aıtyldy.
Otyrysqa qatysýshylar memlekettik apparat qyzmetkerleriniń kásibıligin shyńdaýdyń negizgi tásilderin, kadr saıasatynyń tıimdiligin arttyrý máselelerin talqylady.
Májilis depýtattary jańa Zań jobasyna qatysty naqty usynystary men pikirlerin ortaǵa salyp, memlekettik qyzmettiń tıimdiligin arttyrý zaman talaby ekenine nazar aýdardy.
Sonymen qatar, kóshpeli otyrys aıasynda depýtattar «eQyzmet» júıesiniń fýnksıonaldyq múmkindikterimen tanysty. Memlekettik qyzmetke irikteýdiń jańa onlaın júıesi úmitkerler ózine qolaıly kez-kelgen ýaqytta konkýrstyq irikteýdiń testterin tapsyrýǵa múmkindik berdi. Tıimdiligin kórsetken jańa irikteý formatyna jyl sońyna deıin elimizdegi barlyq memlekettik organdar qosylady.
Ishki kadrlyq prosesterdi sıfrlandyrý, ıaǵnı qyzmetke qabyldaýdan bastap, ony ótkerý, eńbek demalystaryna jiberý jáne ózge de qyzmettik ótinishterdi avtomattandyrý jumysy tanystyryldy. Bul kadrlyq qujat aınalymyndaǵy qaǵazbastylyqtan arylyp, qujattardy rásimdeý tártibin jeńildetti. Elektrondyq jeke ister negizinde «A» korpýsy men saıası laýazymdarǵa tájirıbesi men biliktiligi saı kandıdattardyń tizbesin jasaqtap, memlekettik qyzmetshiler reıtıngin qalyptastaratyn jańa sıfrlyq sheshimniń múmkindikterine erekshe nazar aýdaryldy.
Budan bólek, Májilis depýtattaryna memlekettik qyzmettegi kadrlardyń kommýnıkasııalyq daǵdylaryn shyńdaıtyn ozyq ınnovasııalyq tehnologııalarmen jabdyqtalǵan arnaıy medıa-stýdııanyń qyzmeti kórsetildi.
