Sýretti túsirgen – Valerıı BÝGAEV
Ertis – Baıan óńirindegi shaǵyn jáne orta kásipkerlik sany 2024 jyly 3,2%-ǵa ósken. Olardyń negizgi bóligi kóterme jáne bólshek saýdada (24 262 birlik), aýyl sharýashylyǵy, orman jáne balyq sharýashylyǵynda (7 666), kólik jáne qoımalaý (4 957), qurylysta (3 962) shoǵyrlanǵan.
«Pavlodar oblysy boıynsha Memlekettik kirister departamentiniń aqparatyna sáıkes, 2024 jyly kásipkerlik sýbektilerinen bıýdjetke 672,8 mlrd teńge túsken. Kásipkerlik nysandarynyń kóbeıýine óńirde júzege asyp jatqan memlekettik qoldaý baǵdarlamalarynyń septigi mol. Bizdiń basqarma kásipkerlikti qoldaýdyń, onyń ishinde paıyzdyq mólsherlemeni sýbsıdııalaý (qaryz alýshy úshin túpkilikti mólsherleme 8-10%) jáne nesıelerge kepildik berý (kredıt somasynyń 50-85%-y) boıynsha qarjy quraldarynyń óńirlik úılestirýshisi qyzmetin atqarady», deıdi óńirlik Kásipkerlik jáne ındýstrııalyq-ınnovasııalyq damý basqarmasy basshysynyń orynbasary Darhan Ermaǵambetov.
Kásipkerlerdi qoldaý is-sharalary «Damý» kásipkerlikti damytý qory» arqyly, qarjylandyrý ekinshi deńgeıdegi bankter kómegimen júzege asyrylǵan.
О́ńirde áleýmettik kásipkerlik sýbektileri úshin memlekettik grant berý túrinde memlekettik qoldaý da keń taralǵan. 5 mln teńgege deıingi grantty alý úshin úmitkerler kezekte.kz saıty arqyly qujat joldaıdy. Konkýrsqa qatysýshylardyń deni – «Bir aýyl – bir ónim» baǵdarlamasynyń fınalısteri men áleýmettik kásipkerlik sýbektileri.
«Aýyl amanaty» jobasy sheńberinde de kásipkerler úshin shaǵyn nesıeler berilip keledi. Nesıeniń eń uzaq merzimi – 5 jylǵa deıin, mal sharýashylyǵy salasyndaǵy jobalar úshin 7 jylǵa deıin uzartylǵan. Eń kóp somasy – 2 500 AEK. Aýyl sharýashylyǵy kooperatıvterin damytý úshin 8 000 AEK-ke deıin rásimdeýge bolady. 400 AEK-ke deıingi granttar jáne jastarǵa 2,5%-ben nesıe berýge qatysty baǵdarlamalar da óz kezegimen júrip jatyr», dedi basqarma ókili.
Ertis – Baıan óńirinde reseılik kompanııalarmen birlesken 860-tan astam kásiporyn jumys isteıdi. Olar negizinen mashına jasaý, metallýrgııa, hımııa, tamaq ónerkásibi jáne saýda-sattyq salalarynda tirkelgen («Railways Systems KZ», «Vektor Pavlodar», «Rossdorcom KZ» jáne «Kazcenospheres»). Reseılik kompanııalar ózderiniń saýda ortalyǵy, fılıaly men ókildikterin Pavlodar, Ekibastuz, Aqsý qalalarynda ashqan.
Pavlodar oblysy
