«Tenderdiń» talabynda temir jáshik te bolsa...

Aılap-aptalap keshikse de aýylda turatyn aǵaıyndy gazet-jýrnaldyń ózi izdep barady. Bylaısha aıtqanda, baspasózge jazylǵan bolsa, sómke asynǵan poshtashy, áıteýir, bir jetkizedi. Al qala­daǵy aǵaıyndar jazyl­ǵan gazet-jýrnaldaryn óz­deri izdep júredi. О́ıtkeni, qala­daǵy qaı úıdiń kireberisinde baıaǵydaı poshtanyń temir jáshigi bar deısiz? Sodan úıde kúndiz eshkim bolmaı, esikke qystyryp ketken gazettiń qoldy bolatyny bar. Aqsha shyǵaryp, bireý jazylady, ekinshi bireý qoltyǵyna qystyryp ketip, qyzyǵyn kóredi. Ras, aýylǵa qaraǵanda qala halqynyń gazet-jýrnalǵa jazylýǵa degen yqylasynyń kem bolatyny baıaǵydan bel­gili. Bálkim, olar kóshe boıyn­daǵy dúńgirshekterden satyp ala salǵandy ońaı kóretin shy­ǵar. Múmkin qolyndaǵy ala­qandaı uıaly telefon ar­qyly jańalyqtyń betterin paraqtap, keńse túgili jeke páterlerdiń ózin órmekshiniń toryndaı shyrmap alǵan ınternetten bárin oqyp otyramyz deıtin shyǵar. Qalaı aıtsaq ta, qalalyqtardyń aq­parat alýda múmkindigi mol ekeni ras. Biraq, shahar jurtynyń gazet-jýrnalǵa ja­zy­laıyn degen qadamynyń kibir­tikteı berýine bir jaǵy osy temir jáshik te kináli sııaqty. Shynyn aıtý kerek, kópqabatty úıde turatyn­dar gazet-jýrnaldarynyń aman-esen qolyna tıetinine sen­beıdi. Áıtpese, qalada da kún saıyn gazet qaramasa ishken asy boıyna sińbeıtin kózi qaraqty oqyrman kóp. Qıt etsek: «Baıaǵyda ondaı edi, mundaı edi...», dep ótken­di ańsap shyǵa kelemiz. Árıne, aıtýǵa turarlyq dúnıe bolǵannan keıin aıtylady da. Buryn osy poshta jáshikterin ornatýdy sol úıdiń qurylysyn júrgizetin merdiger moınyna alady eken. Qazir de elimizde qaptaǵan qurylys. Merdigerler záýlim úıler adam balasyna yńǵaıly, jaıly bolý úshin barlyǵyn jasaýda. Biraq, poshtanyń osy temir qorabyna eshkimniń kóńili túspeı tur. Bálkim olar­­dy da kinálaýǵa bolmas. О́ıtkeni, temir jáshikter «ten­derdiń» temirdeı talabynan áldeqashan shyǵyp qalǵan. Joǵarydan: «Mindetti túrde bolsyn», degen pármen bol­ma­ǵannan keıin qaı qurylys basshysy ózi bilip qolǵa alsyn?! Menińshe, poshtanyń temir jáshigi anaý aıtqandaı qymbat turmasa kerek. Taraz qalasynyń ákimi Nurjan Kalenderovtyń eseptik baıan­damasynda 573,5 mln. teńgege 65 páterlik eki úıdiń qurylysy salynyp jatqany aıtylypty. Al endi osy úılerge 6-7 jáshik ornatylý kerek. Olardyń baǵasy jarty mıllıon teńge bola ma, joq pa, áı, qaıdam... Bylaısha aıtqanda, mıyǵynan kúlgen mıllıondardyń tabanynyń astynda jatatyn soma. Bálkim bul sharýany merdigerler demeý­shi retinde ózderi-aq at­qaryp tastar. Áıteýir, osy iske basshylardyń talaby, yqylasy kerek. Kóp­qabatty úılerdiń kireberisi gazet-jýrnal salatyn jáshik­ter­den kóz tartyp turatyn kún bolar ma eken?! Oralhan DÁÝIT, «Egemen Qazaqstan». Jambyl oblysy.