Foto: Turizm jane sport ministrligi
2023 jyly ulttyq sport túrlerimen turaqty túrde shuǵyldanýshylar sany 619,2 myń adamdy qurasa, 2024 jyly bul kórsetkish 666,1 myń adamǵa jetken. Sportpen aınalysatyndardyń jalpy sanynyń 9,6%-y ulttyq sport túrlerimen shuǵyldanady.
Búginde ulttyq sport túrlerinen 16 555 úıirme jumys isteıdi. Sonymen qatar kadr daıarlaý salasynda 15 balalar men jasóspirimder sport mektepteri jáne 17 sport klýby bar. Komandalardy daıarlaýdy úılestirýdi sala mınıstrligine qarasty Ulttyq jáne at sporty túrleri ortalyǵy júzege asyrady.
Dástúrli sport túrlerin nasıhattaýda mańyzdy róldi atqaratyń Ulttyq sport qaýymdastyǵy quramynda kókpar, jamby atý, aýdaryspaq, teńge ilý, báıge, sadaq atý, qusbegilik, toǵyzqumalaq, asyq atý, JORYQ at sporty, ıaǵnı 10 federasııa jumys isteıdi. Odan bólek jappaı kókpar, qazaq kúresi jáne jekpe-jek federasııalary bar. Olardyń ishinde strategııalyq oılaý qabiletin damytatyn toǵyzqumalaq, 159 myńnan astam adam jattyǵatyn qazaq kúresi jáne 78 myńnan astam qatysýshysy bar kókpar sporty erekshe mánge ıe.
Byltyr 5-shi Dúnıejúzilik kóshpeliler oıyndary ótip, etnomádenı qozǵalysqa, ulttyq sport túrlerin damytýǵa da tyń serpin berdi. Sondaı-aq elde jyl saıyn halyqaralyq týrnırlerden bastap aýyl chempıonattaryna deıingi 1000-nan astam jarys ótkiziledi. Sondaı-aq ár 4 jyl saıyn Ulttyq sport túrleriniń festıvali men «Aqbıdaı» respýblıkalyq aýyl oıyndary sııaqty iri sporttyq is-sharalar uıymdastyrylyp keledi.
