Ońtústikte báısheshek gúldedi

Báısheshek kógildir kóılegin kıgen kóktemniń aldyn ala elge súıinshi surap jiberetin habarshysy sııaqty. Eń alǵashqy bolyp kún kózinen sógilgen kóbik qardy tesip shyǵatyn gúl. Aıtýǵa ońaı, bıyl Ońtústikte qys bolmady esebi. Jańa jyldy el kún jyly, jer qarada qarsy aldy. Qar emes, jańbyr tópelep turǵan jyldar da bolǵan. Biraq, aqpannyń ortasy aýmaı jatyp báısheshektiń gúldeýin el nege joryryn bilmeı júr. Ony aıtasyz, osy qańtar, aqpanda da shaǵyn aýlamyzdaǵy jasyl baýdyń qylshyǵy qısaıǵan joq. Jyly qar astynda jatty, qazir oryp almasań, boıymdy tikteı almaımyn degendeı, uzynynan sulap jatyr. Arqadan kelgen naǵashymyz Káribaı Shóshikov Qaraǵandydaǵy dostaryna: «Men qazir fýtbolkamen dalada júrmin desem, senbeı­sińder», dep telefon shal­ǵan. Qaraǵandylyqtardy qaıdam, shymkenttikter senedi. Tap qazir qala tóńireginde oıyn balalary báısheshek terip, asyr salyp júr. «Shymkenttikter sóıtedi, Shymkentte bári bolady», deıdi bireýler qyzbalanǵanda. Iá, solaı. Júregi jyly Shymkent sóıtedi. Baqtııar TAIJAN, «Egemen Qazaqstan». Shymkent.