Qazaq handyǵynyń tusynda bul jerge jyl saıyn han-sultandar, bı-sheshender men batyrlar jıylyp, eldiń tynyshtyǵyn saqtaý, kóshi-qon tártibin retteý, jaýdan qorǵaný, basqa da mańyzdy máselelerdi talqylaǵan. Osy jerde qabyldanǵan «Jeti jarǵy» zańdar jınaǵy eldiń birligin nyǵaıtyp, qazaq halqy tarıhynda qabyldanǵan alǵashqy Konstıtýsııasy boldy desek qatelespeımiz.
Aksııa barysynda Qazaqstan halqy Assambleıasynyń músheleri, etnomádenı birlestikterdiń basshylary, zııaly qaýym ókilderi, stýdentter men qala turǵyndary «Mártóbe» tarıhı kesheniniń aýmaǵynda tazalyq jumystaryn júrgizip, abattandyrýǵa atsalysty. Qalalyq QHA janyndaǵy Aqsaqaldar keńesiniń múshesi Dosybaı Sherimqulov aksııanyń mańyzdylyǵy týraly atap ótip, jınalǵan jurtshylyqty Naýryz merekesimen quttyqtady.
«Mártóbe – halyqtyq bıliktiń qaınar kózi ári dala Parlamentiniń rólin atqarǵan qasıetti oryn. Qazaq handyǵy kezeńinde munda «Jeti jarǵy» zańdar jınaǵy qabyldanǵany tarıhtan belgili. Ol keıin qazaq halqynyń turmys saltyndaǵy quqyqtyq qatynastardyń túzilýine úlken jol ashty. Zań-erejeler arqyly elimizdiń birligi nyǵaıyp, birtutas tártip ornady. Jasyratyny joq, keshegi sol tarıhı qujat negizinde eldigimizdi aıǵaqtaıtyn qazirgi Konstıtýsııamyz qalyptasty. Mártóbe bizdiń táýelsizdigimiz ben birligimizdiń tuǵyrly belgisi retinde qasterlenýge tıis. Sondyqtan mádenı eskertkishtiń qalpyn buzbaı onyń tarıhtaǵy rólin, rýhanı qundylyǵyn keler urpaqqa jetkizý – basty mindetimiz. Sonymen birge barsha aǵaıyndy dástúrli merekemen quttyqtaımyn», dedi eńbek ardageri.
