Keshe, 22 naýryz kúni túnde Qazaqstannyń toptyq kezeńdegi alǵashqy oıynyn ótkizdi. Ýelstiń astanasy Kardıffte ótken matchta Alı Alıev shákirtteri alań ıelerinen 3:1 esebimen jeńildi.
Kezdesýdegi alǵashqy goldy 9-shy mınýtta Ýels shabýylshysy Denıel Djeıms soqty. Oıynnyń 32-shi mınýtynda Qazaqstan quramasynyń kapıtany 11 metrlik aıyp dobyn múltiksiz oryndap, tarazy basyn teńestirdi. Teń eseppen birinshi taım aıaqtaldy.
Ekinshi taımnyń basynda alań ıeleri buryshtama dobyn kóterip, Ben Devıs esepti eseledi. Match aıaqtalýǵa sanaýly mınýt qalǵanda Rabbı Matondo tablodaǵy kórsetkishti 3:1-ge jetkizip, kezdesýdiń núktesin qoıdy.
Sóıtip, Qazaqstan quramasy jeńissiz ótken matchtar serııasyn taǵy da uzartty. Endi bizdiń jigitter úsh kúnnen keıin syrt alańda Lıhtenshteımen sheberlik baıqasady. Match Vadýs qalasynda ótedi.
J tobynda óner kórsetetin Qazaqstan Ýels, Lıhtenshteın, Belgııa jáne Soltústik Makedonııamen upaıǵa talasady.
Aıta keteıik, reseılik maman S.Cherchesov ketkennen keıin Qazaqstan quramasy bas bapkeriniń mindetin atqarýshy bolyp Alı Alıev taǵaıyndalǵan.
Qazaqstan quramasy álemdik mýndıaldiń toptyq kezeńinde sońǵy ret 2013 jyly jeńiske jetti. Ol kezde bizdiń fýtbolshylar Farer araldarynyń quramasyn 2:1 esebimen utqan edi. Sodan beri ulttyq qurama irikteýde 22 oıyn ótkizip, onyń jeteýinde teń tússe, qalǵanynda jeńilistiń kermek dámin tatty.
